UNICEF: Meeqqat inuusuttullu qinersinissami qitiutinneqarlik

Nunatsinni marsip aqqarnanni qinersisoqalerpat, meeqqat inuusuttullu pisinnaatitaaffiisa eqqaamanissaat pingaaruteqarpoq. Taakkumi siunissaat pineqarmat, UNICEF Kalaallit Nunaat erseqqissaavoq.

Taamaattumik ilaatigut qulakkeerneqartariaqarpoq, suliani meeqqanut tunngassuteqartuni meeqqat tusaaniarneqartarnissaat:

– Meeqqat ullutsinni meeraanerminnut immikkut ilisimasaqartuupput. Taakku isiginnittaasiat misilittagaallu asseqanngillat, pitsaanerusunillu akuutitsinerullunilu aalajangiinissani pisariaqartinneqarlutik, Tina Dam UNICEF Kalaallit Nunaanni suliniutinut aquttoq oqarpoq.

Suliniaqatigiiffiup ilaatigut siunnersuutigaa, meeqqat inuusuttullu aaqqissuussamik akuutinneqartarnissaannik inatsimmik akuersissuteqartoqartariaqartoq. Soorlu tamakku tassaasinnaallutik nuna tamakkerlugu aamma kommunini meeqqat angerlarsimaffii pisussaaffilerneqassasut aalajangiinissani assigiinngitsuni meeqqat inuusuttullu isumaasa tusaaniarneqartarnissaannik.

– Massakkut iliuuseqartoqarnissaa pisariaqartipparput, taamaalilluta qulakkeersinnaassagatsigu taakku pisinnaatitaaffiisa ataqqineqarnissaat isumaasalu tusaaneqarnissaat, Tina Dam oqarpoq.