USA-mi politikerip nuimasup oqaasii professorip maluginiarpai
Republikanerip nuimasup Ted Cruzip kongressimi Kalaallit Nunaat pillugu tusarniaanermi Kalaallit Nunaannik suleqateqalernissaq kalaallit innuttaasuinit akuerineqartariaqarneranik arlaleriarluni oqarnera Professorip Rachael Lorna Johnstonep maluginiarpaa. Aammali Amerikami politikkerit amerlasuut Kalaallit Nunaata nammineersinnaaneranik paasinninnginnerat akuerinninnginneraluunniit mianersoqqussutigaa
Præsident Donald Trumpip Kalaallit Nunaata nakkutigineqarnera pillugu oqaasii maannamut inatsisissatut siunnersuutinik marlunnik kinguneqarput.
Assi: Nathan Howard/Reuters/Ritzau Scanpix
USA-p præsidentiata Donald Trumpip Kalaallit Nunaat oqartussaaffigilerusullugu juulli sioqqutitsiarlugu oqaatigaa.
Tamatuma kingorna præsidenti Kalaallit Nunaat soqutigalugu arlaleriarluni oqaaseqarpoq, aamma soqutiginninnera kongressimi inatsisissatut siunnersuutinik marlunni kiisalu senatimi niuernermut, ilisimatusarnermut angallannermullu ataatsimiititaliami tusarniaanermik kinguneqarpoq.
Rachael Lorna Johnstone USA-p iliuuserisimasai qanoq isumaqarfiginerai Sermitsiap aperaa. Taanna Ilisimatusarfimmi inatsisilerinermut professoriuvoq nunanilu tamalaani inuit pisinnaatitaaffii nunallu inoqqaavisa pisinnaatitaaffii pillugit ilisimatusarsimalluni. Fulbright Arctic Iniativ IV-mi, nunanit assigiinngitsunit ilisimatusartunik katersuuffiusoq, peqataalluni maanna Washingtonimiippoq.
Kongressimi siunnersuutigineqartup aappaa tassaavoq Kalaallit Nunaata nutaamik ateqalernissaa, professorillu tamanna pimoorussassatut isiginngilaa, siunnersuuteqartulli maluginiaqqunermik iliuuseqarnertut isigalugu.
Siunnersuutip kalaallit isumaqatiginninniarsinnaasutut inissinngikkai
Siunnersuutip aappaanut tunngatillugu, Donald Trumpip Kalaallit Nunaat pillugu Kunngeqarfimmik Danmarkimik isumaqatiginninniarnissaanik periarfissiisoq, inatsisissatut siunnersuummi Kalaallit Nunaata isumaqatiginninniaqataasussatut eqqaaneqannginnera professorip maluginiarpaa:
- Inatsissatut siunnersuut Danmarkimik isumaqatiginninniarnissamut piginnaatitsiinnarpoq. Allamik periarfissiinngilaq, Danmarkillu naaggaarnissartik erseqqissumik oqaatigereerpaa.
- Kalaallit isumaqatiginninniarsinnaanerannik ersersitsinnginnera malunnartoqanngilaq, Rachael Lorna Johnstone Sermitsiamut allappoq.
Inatsisissatut siunnersuummi suliutsit killormut saatsinneqarnerat ilanngullugu nassuiaatigaa, tassa Trumpip isumaqatigiissuteqassagaluarpat:
- Kongressimit isumaqatigiissut akuersissutigineqarani siunnersuummi ima allanneqarsimavoq Kongressip siunnersuut itigartitsissutiginngippagu isumaqatigiissut atuutilissasoq, Rachael Lorna Johnstone nassuiaavoq.
Cruzip oqaasii maluginiarai
Inatsisissatut siunnersuutit marluk saqqummiunneqarnerisa saniatigut USA-mi kongressimi Kalaallit Nunaat pillugu sapaatip-akunnerani kingullermi tusarniaatitsisoqarpoq.
Tusarniaanermi Amerikamiut siunertaat pillugit nutaarsiassaqarpallaanngitsoq Rachael Lorna Johnstone isumaqarpoq, maluginiagaali tassaapput Republikanerip Ted Cruzip, Niuernermut Ataatsimiititaliami tusarniaanermik ingerlatsisup, oqaaseqaatai arlallit:
- Ted Cruzip arlaleriarluni erseqqissarpaa USA-mut attaveqarnerup allanngortinneqarnissaanut kalaallit akuersisariaqarnerat.
- Cruz republikaneriuvoq nuimasoq præsidentinngorniarluni suliniuteqarluartoq, taamaattumik Trumpip oqaasiinut tamanut toqqaannartumik akerliliilluni Trumpip MAGA-llu akornusersornissaannut periarfissaqanngilaq. Kalaallit Nunaatali pissaanermik atuineq aqqutiginagu USA-mut qanoq ililluni ilanngunnissaanut akuersitissinnaaneraa, toqqaannanngikkaluartumik apeqquteqarluni, immikkut ilisimasalinnut nassuiaatigeqquaa, Rachael Lorna Johnstone naliliivoq.
Naalakkersuisut suli sakkortuumik qisuariartariaqarput
Amerikamiut soqutiginninnerujussuannut Kalaallit Nunaata tuniniarneqannginnera Naalakkersuisut maannamut qisuariaatigisarpaat, kisianni qaninnerusumik suleqatigiinneq aningaasaliinerillu eqqartorneqarnissaat ammaffigineqarluni.
Amerikami politikkerit ilarpassuisa Kalaallit Nunaata nammineersinnaanera paasisimanngikkaat imaluunniit akuerisimanngikkaat Rachael Lorna Johnstonep mianersoqqussutigaa.
Nunalli pissaanilissuit soqutiginninnerat nunat taakkua pingasut akornanni attaveqatigiinnermut sunniuteqangaatsiarsinnaasoq taanna naliliivoq:
- Kalaallit Nunaata, Danmarkip USA-llu akornanni suleqatigiinneq ukiuni qulikkuutaani ingerlasimavoq, tamatumalu allanngornissaa naatsorsuutiginngilara. Immaqa oqallinnerup uummaarissuunera immaqalu toqqaannartumik soqqusaatsumilluunniit oqaaseqartarneq isumannaallisaanermut aningaasaliinernullu tunngatillugu suleqatigiinnerulernissamik imaluunniit eqqissisimanerusumik oqaloqatigiinnissamut ammaassivoq, professori oqarpoq.
Kalaallit naalakkersuisuisa inuiattut pisinnaatitaaffitsik malinneqanngitsillugit, ingammik naalakkersueriaatsiminnik nunanilu tamalaani suleqatiminnik toqqaanissamut namminneq aalajangiisinnaatitaanerannik unioqqutitsisumik, sakkortuumik qisuariartuarnissaasa pingaaruteqarnerat erseqqissarpaa.
