Usha Vancemik ilisarititsineq: Arnaq præsidentip tulliata tunuaniittoq
Usha Vance uimi angusarissaarneranut pingaaruteqarluinnartumik inissisimaffeqarpoq, Kalaallit Nunaanulli tikeraarniarnini pissutigalugu allatut inissisimaffeqalissaaq.
Usha Vancep pisortatigoortumik assilineqarnera. Atuakkat tunuani takuneqarsinnaasut ilinniagaqarluarneranut atuakkanillu soqutigisaqartuuneranut takussutissatut isigineqarsinnaapput.
Assi: Whitehouse.gov / Emily Higgins
USA-p præsidentiata tulliata J.D.
Vancep nulia Usha Vance Kalaallit Nunaannut tikeraassasoq, ilaatigut
Avannaata Qimussersua isiginnaariarlugu, Sermitsiami arfininngormat
allaaserineqarpoq.
Usha Bala Chilikuri Vance San Diegomi
Californiamiittumi peroriartorpoq, angajoqqaavi Indiamiut
universitetini qaffasissumik atorfeqarput. Nammineq aamma
ilinniagartuunngorpoq ilisimatusarfimmilu ataqqisaasumi Yale
Universiymi inatsisilerituutut karakterigissaarluni
naammassinikuulluni.
Yalemiitilluni inuusuttoq J.D. Vance
aamma naapippaa. USA-mi nunarsuullu sinnerani inuppassuit J.D. Vancep
atuakkiaa ‘Hillbilly Elegy’ 2016-imeersoq, 2020-mi
filminngortinneqartoq, aqqutigalugu taanna kinaasoq
paasisaqarfigeqqaarpaat. Atuakkami filmimilu taakkua marluk
tunuliaqutaat assigiinngitsorujussuusut, aamma ulluni
ilungersunartuni qanoq tapersersuisarsimanera pillugu
saqqummiunneqarpoq.
Aappariit 2014-imi katipput
pingasunillu meeraqarlutik. Erneratalu aappaata Avannaata
Qimussersuanut peqataanissani naatsorsuutigaa.
Usha Vance eqqartuussissuserisuuvoq, uinili politikikkut sukkaasuumik annertuumik akisussaassuseqalernera pissutigalugu atorfeqarnini unitsinnikuuaa. Uimi inuunermini ingerlalluarneranut sunniuteqarluarsimavoq, senatoritut qinigaaneranut kingornalu præsidentimut tullersortinngorneranut.
Qinersisartunut moderatiusunut qineqqusaaqqullugu ikiorpaa. Assersuutigalugu politikkikkut akerlilersuisunik "arnat meeraqanngitsut qitsuutilinnik" taaguineranik isorineqarmat tapersersornikuullugu.
Politikkikkulli isiginnittaasini imaluunniit eqqarsaatit akerleriissutaasinnaasut saqqummiuttarsimanngilai. Taamaattumillu Kalaallit Nunaannut sapaatip-akunnerani matumani politikkikkut pissutsit ilungersunarnerisa nalaanni tikeraarniarnera politikkikkut malinnaasunit arlalinnit tupaallaatigineqarpoq.
Marsimi siusinnerusukkut innarluutilinnut ukiuunerani OL-ertoqarnerani USA-mit aallartitatut peqataavoq.
Indiamiu-amerikamiusut India alutoriuarsimavaa. Usha Vance hinduiniit kingoqqisuunini pissutigalugu Amerikami ingerlalluartoq ilaqutaasa ilaa BBC-mut oqarpoq.
