Video aamma assit takukkit: Kalaallit Nunaat Trumpimut akerliuvoq

Nunatta erfalasui amerlangaaqisut Nuummi Sisimiuni Qaanaamilu takussaapput. Nalliuttorsiortoqanngilarli, akerliussutsimik takutitsinissaarsuaqarpoq.

- Peqataasut taamak amerlatigippata attorteqaanga. Akerliussutsimik takutitsinermut taama angitigisumut peqataanikuunngisaannarpunga, Nuummi akerliussutsinermut aaqqissuisuusoq, Orla Joelsen Sermitsiamut oqarpoq.

Nunatta ilaani arlalinni innuttaasut Donald Trumpip nunatta tiguarnissaanik tunngatillugu oqaaserisai akerliuffigaat.

“Naammalerpoq!” oqariartuutigineqarpoq, aamma “Kalaallit Nunaat kalaallit pigivaat” nipituumik oqariartuutigineqarpoq.

Partiit siuttui tallimanngormat ataatsimut nalunaaruteqarput, tassanilu USA-p præsidentiata oqaasii sakkortuumik isornartorsiorpaat.

Akerliussutsimik takutitsit aatsaat taamak annertutigisoq

Akerliussutsimik takutitsinermut aaqqissueqataasoq, Steen Olsen Sermitsiamut oqarpoq akerliussitsimik takutitsinermut aatsaat taamak peqataaffigineqartigisumut peqataalluni.

Sisimiuni video takujuk:

Christina Johnsen Sisimiuneersoq Sisimiuni akerliussutsimik takutitsinermi siuttuuvoq:

- Uagut aamma takutitserusuppugut akuerisinnaanagu USA'p præsidentiata taamatut pissusilersornera. Ataatsimilluunniit Naalakkersuisutsinnut toqqaannartumik saaffiginnilluni kusanartumik ileqqorissaarluni saaffiginninngilaq. Nammineq mediani atorlugu taamatut makkuluttaqattaarpoq. 

- Taava aamma ernera nuummiimmat oqarpoq "takuuk kalaallit asavaannga, USA asavaat", takutikkusupparput tamatta tamaanngitsugut. Neriuppunga inuiaqatigiittut ataatsimoorneq ataqatigiinneq partii apeqqutaatinnagit ataatsimoornerput takutissinnaallugu.

- Donald Trump, respect Inuit, respect our country and respect our nationality,  Christina Johnsen Sermitsiamut naggasiilluni oqarpoq.

Sisimiuni innuttaasoq, John Peter Poulsen erfalasulerluni akerliussutsimik takutitsivoq.

- Nunarput pillugu peqataavunga, tuniniagaanngilaq. Tapersersuiniarlunga ataatsimoortunut, partiillu siulittaasui tamarmik tapersersorniarlugit peqataavunga. 

Nunarput imminut pigivoq

- Trump oqarfigerusuppara nunarput tuniniagaanngitsoq.

Emma Jensen sunnertisimaqaluni aamma peqataavoq:

- Nunarput tuniniagaanngimmat. Aamma taama oqaannartoqarsinnaanngilaq. Uanga oqarnavianngilanga "innga nuna pisiarilerpara", taama oqaannartoqarsinnaanngilaq. Akerliussutsimik takutitsivunga taamaammat. 

- Oqarfigerusuppara: Kalaallit Nunaat puigoruk. Alaskatut Canadatullu ilerusunngilagut.

Borgmesteri Malik Berthelsen aamma akerliussutsimik takutitsisut akornanniippoq:

- Amerikarmiut præsidentiata taamatut inoqatinut taama ataqqinninngitsigineranut akerliunerput takutitseqataaffigerusukkakku. Inuk taanna taamak naatsorsuutigiuminaatsigisoq nalunartuaannarpoq qanoq isumaqassanersoq. Kisianni neriuppunga paasissagaa kalaallit qanoq isumaqarnerat Trumpimut tunngatillugu.

Konsulip tungaanut ingerlaaqatigiinnersuaq

Nuummi aamma inuit hunnorujulikkaat arlallit akerliussutsimik takutitsinermut peqataapput.

Partiit siulittaasui innuttaasullu Amisunit Nuummi konsulateqarfimmut ingerlaaqatigiipput. Ataatsimut oqariartuuteqarlutik: Kalaallit Nunaat uagut pigaarput, Kalaallit Nunaat nunanut allanut ilanngunneqassanngilaq.

Naalakkersuisut siulittaasuat Múte B. Egede (IA) partiit siulittaasuinik peqateqarluni Kalaallit Nunaat sinnerlugu Donald Trumpimut ataatsimut nalunaarummik nassiussisoq akerliussutsimik takutitsinermut peqataavoq:

-  Assorujussuaq nukinnik tunisivoq, aamma tuppallernarpoq inuit taama amerlatigillutik ataatsimoornermik takutitsinerat. Aamma akuersaarneqarsinnaanngilluinnarpoq nunap allap siuttuata nunatsinnut taamatut tatisitiginiarsarinera. Ataatsimoorneq nukigivarput, Múte B. Egede oqarpoq.

Demokraatit siulittaasuat Jens-Frederik Nielsen aamma akerliussutsimik takutitsinermi peqataavoq, Múte B. Egedep saniani nikorfalluni:

-  Tuppallernarlunilu tulluusimaarnarpoq, aamma Múte oqarneratuut nukerujummik tunisivoq. Suulluunniit allat oqaatigineqarsinnaapput, kisianni tamatumani tamatta isumaqatigiippugut ataatsimoorlutalu.

Nuummi video takujuk:

Københavnimi aamma akerliussutsimik takutitsisoqarpoq, Kalaallit Nunaat taperserneqarluni.

Nuummi akerliussutsimik takutitsinermit assit amerlanerit uani ataani takusinnaavatit: