Anorlertaraluartoq golfertarneq

Kalaallit Nunaanni timersorneq eqqarsaatigigaanni golf siulliullugu eqqaaneqartatunanngilaq.

Ujakkaarneq, qimussimik sukkaniunneq imaluunniit timersortarfinni kiassagaasuni unammiuaarnerit eqqarsaatigineqartarunarput.

Nunamili putut qulingiluat isiginnaartitsiviillu marluk qaqqat kangerluullu isorartuup akornanniipput. Tassani golferneq silaannarmi qaarsut isugutat akornani – aamma isiginnaartitsivinni qaammaqqutaasuni, nunatsinni silap nunarsuarmi arsaattarfinnit tusaamasanit taarserneqarnerani – pisarpoq. Nuuk Golfklub ukiunik 25-nngortorsiorluni nalliuttorsioqqammerpoq, tamannalu Kalaallit Nunaanni golfertarnerup assigiinngitsorpassuartigut ingerlanneqarsinnaaneranik takussutissaavoq.

Kalaallit Nunaat unganartoq

Lars Kruuse Simon Westmannilu septembarip ulluisa ilaanni ualinerani Nuuk Golfklubip illuutaata qaqortup silataani naapipput. Golfimut aaqqatitik ativaat, pooqattatillu nammagiuteriarlugit golfertarfimmukarput – sungiusimasatik malillugit. Simon aallartilluarpoq, putumilu siullermi anaasinerit naatsorsuutigisamik ikinnerummata ingerlalluarpoq. Lars, Nuuk Golfklubimi aamma siulittaasuusoq, amerlanerulaanik anaasivoq. Kikkut tamarmik inissaqartariaqartut oqarpoq illarlunilu. Kikkullu tamarmik inissaqarput – tassa Nuuk Golfklubip siunertaa.

Marluullutik danskiugaluarlutik Kalaallit Nunaat nuannaraat. Simon kalaallimik nuliaqarpoq, Larsillu — aap, angerlarsimasuusiinnarpoq.

- Kalaallit Nunaat unganarsisarpoq, golferummillu tigummiaqarluni silaannarissumiikkaanni angerlarsimasutut misiginarpoq, Lars qungujulluni golfernermi pooqattaq oqimaatsoq kiviitigalugu qaqqallu tungaanut qiviaatigaluni oqarpoq.

Qaqqat isugutattut akornanni avatangiisiat ukiarpalaalersimavoq — orsuaasat aappalungajallutillu paarnaqutit sungaartissimapput. Golfertarfimmi suli unammisoqarpoq, nipaaqimmallu anorip siorsuanera, golfertut golferutaasa pooqattami aviluarpalunnerat golfertullu arsaata qaarsumut nipitoqisumik tuttarnera kisimik tusarsaapput.

Kalaallit Nunaanni golfertarneq nuannersuuvoq – pinngortitami unammillernartut timersornerullu imminut unammillernartuunera pissutigalugit.

- Golfi immikkuullarissuuvoq. Immaqalu timersuutimi kisiartaalluni akunnerpassuarni sungiusariarluni sekundialuinnaat ingerlanerini anaasiffiusarpoq. Eqqarsaatiginneqqissaarneruvoq nuannaarujussuarfiusarlunilu, Simon Westmann oqarpoq, taanna ukiuni qulini Nuummi Golfklubbimi ilaasortaasimavoq, golfertarfimmilu tusaamasaasumi ataasiaannarluni arsamik anaasilluni putumut nakkartitsisimasut ikittuinnaat ilaagaat.

Taartumi golfertarneq, isiginnaarullu qaamasoq

Lars Simonilu naammassigamik timersortartut illuutaannut kialaartumut iserput. Aaqqatitik peeriarlugit pisuusaartitsilluni golfertarfik ikippaat – skærmillu ikikkiartuaarnerani inip isuani seqertitsisarfik qaammariartorpoq. Tassanngaannarlu Nuuk pinnani Floridami Skotlandimiluunniit golfertarfik qorsooqqissoq nuivoq. Tulleriiaarlutik anaasisarput, sakkukisaanngillallu. Bang! Arsaq seqertitsisarfimmut, taarserneqartinnani ukioq ataaseq affarlu taamaallaat atorsinnaasartumut, tukkaangat nipitoorujussuusarpoq.

Ukiukkut issikkaangat apisimaneralu pissutigalugu silami golfertartoqarsinnaanngikkaangat golferneq tassani nanginneqartarpoq. Nuuk Golfklub marlunnik nutaaliaasunik pisuusaartitsilluni golfertarfeqarpoq, ilaasortallu - sila qanoq ikkaluaraangalluunniit - periusiminnik sungiusarsinnaallutillu unammisaqattaarsinnaapput. Ukiup ataatsip ingerlanerani sungiusartarfinni taakkunani marlunni katillugu 317.000-eriarluni anaasisoqarpoq, nunarsuarmilu golfertarfiit tusaamaneqarnerpaat ilaat golferfigineqarsinnaalertarput, peqatigitillugulu timersoqatigiiffimmi golfertartut aamma ullut sivikillillutillu taarsigaangata uummaarissumik ataatsimoorfiusutut katersuuffigisarpaat.

- Qaqqani pisuttuarnertut inngilaq, kisianni anaasisarneq sungiusarneqartarlunilu ataatsimoorfiusarpoq, Simon Westmann oqarpoq.

Pisuusaartitsilluni sungiusarfiit ukiukkut taartarnerani katersuuffittut atorneqartarput. Tassani periuseq sungiusarneqartarlunilu, unammisoqartarlunilu pinnatassartalimmik nuannersumillu unammiuaartoqartarpoq. Amerlasuunut golfernermik nuannarisaqartuarnissamut periarfissaavoq – aputip aakkiartornissaa silamilu golfertarfimmi unammisoqaqqilernissaata tungaanut. Pisuusaartitsillunili golferneq ukiukkuinnaq periarfissaannaanngitsoq timersoqatigiiffimmi siulittaasup Lars Kruusep oqaatigaa. Nuup avataani periarfissarpassuaqartoq takusinnaavaa.

- Takorlooruk illoqarfinni soorlu Ilulissani Sisimiuniluunniit pisuusaartitsilluni sungiusaatini peqartoq. Taava nunatsinni unammiuaarsinnaassaagut – internetikkut toqqaannartumik, taanna oqarpoq.

Nuummi pisuusaartitsilluni sungiusaatit atortorissaarutit TrackManimeersut atorlugit nunarsuarmi sumiikkaluaraanniluunniit - aamma Kalaallit Nunaanniinngikkaluarunilluunniit - toqqaannartumik unamminermi atorneqarsinnaapput.

- Tamanna immikkuullarissorujussuussaaq. Golfi timersuutaavoq Kalaallit Nunaanni tamarmi inunnik ataatsimoortitsisinnaasoq – ungasikkaluaraanni, taaraluarpat silarlukkaluarpalluunniit. Seqertitsisarfik, allungiartorfik anaasisinnaanermullu inissaq kisimik pisariaqartinneqarput, Lars qungujulluni oqarpoq.

Golfertarfik asseqanngilluinnartoq

Nuuk Golfklub nunaqavissuinnaat golfernermik nuannarisaqartut kisimik ornigartagarinngilaat. Umiarsuarnik takornariartaatinik aasat tamaasa kangerlummut pulasoqartarpoq, taakkunanilu angalasut nunarsuarmit tamarmeersut ilaasarput – taakkunannga amerlasuut golfertarfimmi alianaatsumi golfernissamik takorluugaqarput. Amerlasuut Kalaallit Nunaanni golfersimanerminnik oqarsinnaarusuttarput – ilaallu unnuakkut qaamasumi golfernissaq misigerusuttarlugu.

- Unnukkut seqineq suli tarrinngitsoq golferluni misigisaq tupinnangaarpoq, Lars Kruuse oqarpoq.

Tikeraartorpassuillu golfertarneq kisiat soqutiginngilaat — nunamut allamut tikissimanngisaminnut tikinneq misigisarpaat.

- Takornariaq ataaseq nunarsuarmi golfertarfiit pisoqaanersaanniilluni isumaqarsimavoq. Klubbili ukiut 25-innaat matuma siorna pilersinneqarsimasoq nassuiaappara, illarlunili akivaanga: Aap soorunami, qaarsulli golfertarfiup ataaniittut milliardilinnik pisoqaassuseqarput. Tamannalu assortorsinnaanngilara, Lars qungujulluni oqarpoq.

Inuunermi timersuut — tamanoortorlu

Nuuk Golfklub ullumikkut 140-nik ilaasortaqarpoq – ilaasortat ataatsimuullaqqissut ukiullu tamaasa amerliartortut. Siulittaasorli Lars Kruuse naapertorlugu alloriarnissaq tulleq suussanersoq ersarippoq: Inuusuttut amerlanerusut.

- Inuusuttunik sungiusaasalerniarlutalu meeqqat inuusuttullu aallartinnissaat ajornannginnerulersinniarparput. Angissuseq misilittakkallu apeqqutaatinnagit kikkut tamarmik peqataasinnaaniassammata atortunik mikisunut tulluartunik pissarsinissaq pilersaarutaavoq, taanna oqarpoq.

Simon Westmann naapertorlugu golfi timersuutit inuuneq naallugu sammineqarsinnaasut peqataaffigiuminarnerpaat ilagaat.

- Toqussat tikillugu golfertarsinnaavutit. Timimut ilungersunartuunngilaq, kikkulluunniillu – qanorluunniit ukioqaraluarpata piginnaaneqaraluarpataluunniit – golfeqatigisinnaavatit. Pitsorluttunut periuseqarnera pissutigalugu arfineq pingasunik ukiulik golfertaleqqammersoq 80-inik ukiulimmut misilittagaqarluartumut naapertuilluartumik unammisinnaasarpoq. Tamanna golfernerup immikkuullarequtigaa, Simon oqaluttuarpoq.

Unamminerli kisiat pineqanngilaq. Golfi aamma Simonimut eqqarsartaatsikkut sunniuteqartarpoq.

- Imminut ilikkarnartupilussuuvoq. Misigissutsit aqukkuminarnerulerlutillu, periusissiorluarsinnaanerulerlutillu ajornartorsiutinik aaqqiilluarnerulersinnaavutit. NAguniagaq anguniaannarnagu ingerlanerit akueriinnartariaqarpat. Golfertartutut naammassisoqarsinnaanngisaannarpoq. Pitsanngoriartortoqartuaannarsinnaavoq, Simon oqarpoq.

Qaqqat tunuliaqutaralugit, anorleraluartoq teknologiilu atorlugit Kalaallit Nunaanni golferneq immikkuullarissuusoq Nuuk Golfklubip uppernarsarpaa. Anaasinerit angusallu nalunaarsorsimaffii kisimik pineqanngillat – ataatsimoornerli, pinngortitami misigisat timersornerlu inuuneq naallugu malinnaaffigineqarsinnaasoq pineqarput. Qaqqani seqertitsivimmilu.