Assammik arsartartut piukkunnaatillit Danmarkimi katersuuttut
Assammik arsartartut piukkunnaatillit Danmarkimi najugallit ukiup unammiffiusup matuma ingerlanerani pingajussaannik naapipput.
Unammisartut aqutsisulllu sungiusareernerup kingorna.
Assi: Knud Fl. Larsen
Sungiusaqatigiinneq Fynip kujataani Gudmemi GOG Hallerne-mi juunip qiteqqunnerani sapaammi ualikkut pivoq.
Niviarsiaqqat arfineq-marluk nukappiaqqallu aqqanillit Kathrine Mikkelsenimit, Rasmus Larsenimit målmandinillu sungiusaasumit Bent Møllerimit aqunneqarlutik sungiusarput.
GOG-mut sungiusarluni unammineq
Kalaaliaqqat nukappiaqqat GOG U17-it pikkorissut unammivaat. Unammisut imminnut naligiilluarput. Unamminerit immikkoortut pingasut minutsinik 20-nik sivisussusillit ingerlanneqarput. GOG immikkoortuni marlunni ajugaavoq, Kalaallit Nunaallu immikkoortumi ataatsimi ajugaalluni.
Unammisartut ullut tamaasa unammineq ajornerat eqqarsaatigigaanni unammineq pissanganarlunilu tamarmik akiuulluarput.
Ajoraluartumik kalaallit niviarsiaqqat naligisaminnik unammisassaqanngimmata imminnut unammillutik sungiusartariaqarput. Kissassernerminillu naliminnit unammineqalerput, taakku nukappissat sungiusaqatigigamikkit.
Suliniut ingerlaannartoq
TAAK Timersoqatigiiffik Assammik Arsartattut Kattuffiata minnerunngitsumillu unammisartut sungiusarnerit naammagisimaaramikkit sæsonimi tulliuttumi sungiusarnerit ingerlateqqinneqassasut aalajangerput.
Unammisartulli ilaat Danmarkimi efterskolemi atualissammata taarserneqartarnissaat pissaaq.
