Kalaallit Nunaanni isikkamik arsaattartut alutorersuaarpakka

 Tujuulorpaaluit assigiinngitsunik qalipaatillit Venedigimi inissiat ilaanni sikaavimmiittuutigineqartut Juventusimi AC Milanimiluuniit isikkamik arsaattartut klubbiineersuunatik nunatsinni isikkamik arsaattartut klubbiineersuupput. Tungujortuupput, qaqortuupput qorsuullutillu. Tujuulunik taakkuninnga piginnittup nunarput tusaamaannarlugulu isiginnaagassiatigut taamaallaat takunikuuaa – taamaakkaluartoq nunatsinnut atassuteqarluinnartutut misigisimasarpoq. Kalaallimmi isikkamik arsaattartui nuannaartorilluinnakkani Italiamiit tassa nunatsinniit kilometerinik tuusintilikkuutaanik ungasitsigisumiit malinnaaffigisarpai, taamaalillunilu arsaattartutsinnik nuannaartorinninnerpaat ilaattut taaneqarsinnaagunarluni.

Nunanit avannarlerneersut tiguartiffigigai

Itsarnisarsiooq 29-nik ukiulik Lorenzo Bigo nunatsinni qaqqanit ungaseqisumi Venedigimi alutornartunik illorsuaqarfiusumi najugaqarpoq ilimaginngisamik soqutigisaqarpoq. Taassumami soqutigisai najukkamini ikerasalianut oqaluffinnulluunniit tunngassuteqanngillat – najukkaminiilli ungaseqisumiittunut tassa nunanut avannarlernut attuumassuteqarlutik. 

- Isikkamik arsaattartut nunallu assingi alutoriuaannarnikuuakka. Ingammik nunani avannarlerni Issittumilu isikkamik arsaattartut tiguartiffiginikooqaakka, kalaallillu isikkamik arsaattartuinik taamaalillunga nuannaartorinninneruleraluttuinnarlunga, Lorenzo Bigo oqaluttuarpoq. 

Lorenzo Italiami tassa nunami kiattumi arsaattartorpassuaqartumilu peroriartoraluarluni isikkamik arsaattartortaminnut tiguartinnikuunngilaq. 

- Kalaallit isikkamik arsaattartui Europamiut allamiulluunniit arsaattartuisa akornanni takussaajunnaarnikunik peqarput: tassa pimoorussineq, nuannisarneq ataatsimoornerlu anersaaralugit unammisarput. Nunarsuarmi isikkamik arsallaqqinnerpaanut ilaannginnerat soqutiginngilara – anersaaqarfigilluinnarluguli pingaartilluinnarlugulu unammisarnertik immikkuullarequtigilluinnarpaat, Lorenzo Bigo qiimmattarluni oqarpoq. 

Lorenzop nuannaartorinningaarnera arajutsisassaanngilaq. NP-mik aamma taaaneqartartumik ukiut tamaasa Nunatsinni Pissartanngorniuttoqarnissaanut qilanaartuaannarlunilu umanninerit toqqaannartumik aallakaatinneqaraangata malinnaaffigisarpai kalaallisut oqaluttut tusarnaajutigalugit. 

- Unamminerit toqqaannartumik aallakaatinneqaraangata tamatigut isiginnaartarpakka. Ukiumut qilanaarinerpaasartakkama ilagisarpaat, Lorenzo oqarpoq.

Katersugaatai qaqutigoortut

Lorenzop katersugaatai asseqanngitsuupput: taakku tujuuluupput 24-t nunatsinni timersoqatigiiffiit anginerit nunaqarfinnilu avinngarusimasuniittut nunatta avataaneersunit ikittuinnarnit ilisimaneqartuusut pisortatigoortumik unammigaangamik atortagaat. 

- Tujuulut taakku tamarmik immikkorluinnaq oqaluttuassartaqarput, tamarmillu uannut pingaarutilerujussuupput, Lorenzo pingaartippaloqalugit oqarpoq. 

Tujuuluk Nagdlunguak-48-meersoq, klubbi illersortagaaneersoq tassa B-67-imeersoq qaqutigoortorlu tassa Narsarsuarmi FC Bluiemeersoq Lorenzop katersugaataanut ilaapput. Kujataani nunaqarfeeqqami Narsarsuarmi timersoqatigiiffik FC Bluie 2011-mi pilersinneqartoq ilaannikkuinnaq unammiuaaqataasarpoq, nunattalu sinnerani qaqutiguinnaq eqqaaneqartarluni. Taamaammat immikkuullarinneruvoq: nunatta avinngarusimanerusortaaneersuummat qaqutigoorlunilu Lorenzop soqutigisaata qanoq ungasitsigineranut takussutissaavoq. Lorenzo Bigop tujuulut Nanortalimmi Siuteroq-43-meersoq Qaanaamilu QSC-meersoq katersugaatimini amigaatigisani pissarsiarerusuppai. Lorenzoli katersugaaterpassuamini nuannarinerpaasaqarpoq. 

- Nuannarinerpaasara tassaavoq B-67-ikkut najukkaminni unamminermi tujuuluat 2020-meersoq. Tujuuluk taanna katersugaatima siullersaraat, atsippaavanilu Italiamiut oqariartaasiat andrà tutto bene (suut tamarmik iluatsissaqqaarput, aaqq.) allassimavoq. Tujuuluk taanna nunagisanniit tassa Italiamiit Kalaallit Nunaannut atassuteqartorujussuanngorninnik aallarniisuuvoq, Lorenzo oqaluttuarpoq.

Ilaqutariit arsaattartut attavigisarai

Lorenzo Bigop tujuulut sikaavimmiittuutigisai nunatsinnut attaveqartarneranut pissutaasutuaanngillat. Nunatsinnimi arsaattartut sungiusaasullu, ingammik Nuummi arsaattartoqatigiit B-67-imeersut inoqatinut attaveqatigiittarfikkut Messengerikkut oqaloqatigisarnerisigut atassuteqarfigillualersimavai. Tamannalu ilaqutariinnut arsaattartunut attaveqarnermut assersuunneqarsinnaavoq – tassa - isiginnaagassiatiguinnaanngitsoq ataatsimoornertut taaneqarsinnaalluni. 

- Kalaallit Nunaat tutinikuunngisaannaraluarlugu atassuteqarfigisutut ippara, Italiaminngaanniit nuannaartorinningaartoq oqarpoq. 

Sunaaffali attaveqaatikkuinnaanngitsoq aamma atassuteqarfigilerumaarini. B-67-immi unammisartuisa sungiusaasuisalu ilaat 2023-mi oktobarimi siullerpaamik naapippai. Lorenzomi itsarnisarsiuutut suliaqartilluni timersoqatigiiffiup B-67-ip unammisartoqatigiivi U11-t Verona Cup-eriassallutik Jesolomut taamanikkut aqqusaallatsiarneranni naaperatarmagit, sungiusaasoq Ole Louis Rasmussen arsaanneq pillugu oqaloqatigalugulu tunissutinik paarlaasseqatigaa. Paarlaasseqatigiissutaallu tassaapput kalaallit unammisartut tujuuluat teqqialillu Venezia FC-meersoq. Lorenzo Olelu Veronami ukioq ataaseq qaangiuttoq naapeqqeratarput. Olep tamatumuuna timersoqatigiiffik illersortakkami B-67-ip arsaattartoqatigiiviisa inuusuttai pitsaanerpaartaallu taamanikkut angalaqatigai. Kulturimut, arsaannermut ikinngutigiinnermullu tunngasunik Italiami ullormi tassani eqqartueqatigiillutillu kalaallit unammisartui kuultinnapput. 

- Ualeq taanna puigunaappoq. Inuusuit Kalaallit Nunaanneersut Italiami unamminermi kuultinnattut isiginnaarakkit tulluusimaaqaanga, Lorenzo Bigo oqaluttuarpoq.

Kalaallit Nunaat pillugu takorluugaqartoq

Lorenzo nunatsinniinnikuunngisaannarami nunatsinni arsaattarfiit ilaanniinnikuunngisaannarpoq. Tassa nunatsinni arsaattarfiit ivigaasalersukkat alutornaqisunik avatangiisillit ilaanni anorlertillugu unammisunik isiginnaarsimanngisaannarpoq. Tamatumali misiginissaa Lorenzo Bigop takorluugaraa: tassa nunatsinni arsaattut isiginnaariallu ungasianiinnaq isiginnaartakkami ikinngutitoqqatulli atassuteqarfigisutut misigisani akornanniinnissaq. 

- Qanimut nammineq misigiartorlugit Nuummut tikeraarnissara takorloortarpara. Kalaallinilli ikinngutigilersimasannik puigunaatsorsiffigisannik naapitaqarnera taamanikkussamut eqqaamasaqarfigiinnartariaqarallassavakka. Asseqanngitsunimmi misigisaqarfigaakka: tassa nunamut nammineq nunagisanniit kilometerinik tuusintilikkuutaanik ungasitsigisumiittumut atassuteqartutut misigisimaneq, Lorenzo oqaluttuarpoq. 

Nunatsinnili isikkamik arsaattartunik nuannaartorinninnerpaat ilagigunagaata kalaallit nuannaartorilluinnakkani unammineranni taamaalluni nunatsinnukarnissami tungaanut Venedigimi inigisaminiit kalaallit arsaattartuisa tujuulorpassuinik sikaavimmiittuuteqarfigisaminiit illersortuartarniarpai.