Sondre Slettemark oqaluttuarisaanermut ilannguttumik angusaqartoq
Kalaallit ooqattaasartuat Sondre Slettemark Verdenscupimi inuusuttut ataatsimut aallarneranni ajugaavoq, tamannalu oqaluttuarisaanermut ilannguttumik angusaavoq.
Sondre Slettemarkip ajugaasumut nersornaasiuttagaq tigummiaraa, tassanilu inuusuttut nunarsuarmi pissartanngorniunneranni ataatsimut aallarnermi ajugaasuusimasoq takuneqarsinnaavoq, tamannalu oqaluttuarisaanermut ilannguttumik angusaavoq.
Assi: Nunatsinni Sisoraaserlutik Ooqattaasartartut Kattuffiat
Sondre Slettemark napparsimanini pissutigalugu Junior VM-imi unamminerni sisamaasuni marlunni peqataasinnaasimanngikkaluarluni ajugaasuuvoq.
- Ataatsimut unamminermi ajugaanissaq anguniagaraara, unamminerninili sisamani marloriaannarlunga apuussimagama ajugaanissara ilimagisimanngilara, Sondre Slettemark Nunatsinni Sisoraaserluni Ooqattaasartartut Kattuffiata tusagassiuutinut nalunaarutaani oqarpoq.
Formel 1-imitut unamminerit
Sisoraaserluni ooqattaasarneq timersuummi Formel 1-itut unamminertut taaneqarsinnaavoq, tassanilu 12 kilometerit arpaffigineqartarlutillu sisamariarlunilu ooqattaasartoqartarpoq.
Maanna Sondre OL-imut anngunniulluni arpanniarluni Estlandimukassaaq.
Maannakkut arpattartut nunanit OL-imut anngunniuteqataanngitsut 15-it ’aallartitaanissaannut’ unammineranni normu 2-juvoq.
- Ukiumi unammiffiusumi angusarissaarluarpunga, ingerlaqqinnissaralu qilanaaraara. Inuusuttut 23-it inorlugit ukiullit pikkorinnerpaat tujuuluat atorlugu Nunarsuarmi Pissartanngorniuuteqataanissaq tulliullugu anguniagaraara, sisoraaserluni ooqattaasartartoq 20-nik ukiulik oqarpoq.
