Aaqqissuisuuneq innersuussivoq: Bruce Lee – maligassarujussuaq
Bolethe Stenskovip suut perusunnerlugit angorusunnerlugillu nalunngittuaannarsimavai, inuillu inuuneraniittut malinnaarusunnerlutik malinnaarusunnginnerlutilluunniit namminneq aalajangertarpaat. Taassuma suliffigerusuttuaannarsimasani Qaqortumi kommunimi suliffittaaraa Timersoqatigiiffiullu Kattuffianni arnani siullersaalluni siulittaasunngoqqammerluni.
Bolethe Stenskov ukiuni 27-ni Narsarmiooreerluni Qaqortumut nooqqammerpoq. Taanna illoqarfinni assigiinngitsuni arlalinni peroriartorpoq, meeqqanilu toqqissisimanerusumik peroriartortikkusussimavai naak meeraalluni nuuttaqattaarneq ajorinngikkaluarlugu.
- Nalimmassapallattarpunga. Inuuninni iluaqutigisarsimavara, kisianni akornutitaqarpoq aamma assersuutigalugu aanakkukka ilisarisimalersimannginnakkit. Taamaammat uigalu aalajangerpugut Narsami toqqissilluta najugaqassalluta meeqqatta inersimasunngorlutik namminneq inuuneqalernissaasa tungaanut, oqarpoq.
Nuuttaqattaartorujussuusimagaanni ukiuni 30-ngajanni aalajangersimasumik najugaqarnissaq aamma sungiunniagassaavoq. Timersornerup silarsuaani akuuneq tassunga iluaqutaasorujussuusimavoq. Taamaalilluni allamut saassinnaasarami. Timersorneq aqqutigalugu Kalaallit Nunaat tamapajaat takunikuuaa, nunanullu allanut aamma angalasarnikuulluni.
Angajoqqaavi kujataamiuupput 57-inilllu ukiulik Timersoqatigiit Kattuffianni siullersaalluni arnani siulittaasunngortoq Narsamijini inunngorpoq. Meeraanerminili sivisunerpaaq Qaanaami najugaqarpoq – siullermik tallimanik ukioqarluni – ulloq mannalu tikillugu angerlarserfigiuartarpaa angerlarsimaffivittulli misigalugu. Naak tikippiarneq ajoraluarlugu. Timersornermullu atatillugu tikikkaangamiuk misigiuaannarpoq anersaartorluarsinnaanngorluni. Qaanaamut siullerpaamik tikeqqaarami eqqaamanngilaa qanoq eqqarsarnerluni misiginerlunilu, kisianni eqqaamasanik erlinnartunik eqqaamasaqarfigaa. 1979-imi apersortittussaalluni ilaquttanilu Nanortalimmut nuupput.
Bolethep aasakkut taamani seqineq kaaviinnartoq sungiusimavaa ukiukkullu kaperlattarnera. Aasakkut nuupput, Kangerlussuarmullu tikimmata taarsiarsaalereersimavoq. Aasakkut.
- Ersisorujussuuvunga, illarpoq.
Naneruutit qaamanerat ersinngitsoq
Angutaa, Amandus Petrussen, palasiuvoq taamanilu taakkua aalajangiisinnaatitaaneq ajorput. Nooqquneqaraangamik nuuttarput. Taamaammat meeraanermini Narsami, Alluitsup Paani Qaqortumilu najugaqarsimavoq.
- Ataataga ukiut tamaasa suliffimmiit akiliunneqarluni angalasinnaatitaavoq, taamaammat Danmarkimiinnikuullutalu kujataaniittarpugut. Aasakkut taarnera misigereernikuuara. Angerlarsimaffimmili aasakkut taarsisarnera allaaneruvoq, nassuiaavoq.
Nanortalimmi juullisioqqaarneq aamma eqqaamavaa.
- Qaanaami juulli immikkuullarippoq, igalaap saani naneruutit qaamaneri qanilaassuserlu. Nanortalimi juulliaqqami qiallunga eqqaamavara, anaanamalu ornippaanga aperalungalu sooq qianersunga. ”Naneruutit qaamaneri takusinnaanngilakka”, illalaarluni maanna oqaluttuaraa. Boletheli inuusuttuulluni taamani qiageerpoq, juulliaqqami seqinnernera misillerfigalugu.
Kujataamiut aamma oqaluttarneri arriippallaaralugit eqqaamavaa, anersaaruluutigalugu illarluni oqarpoq.
- Kujataamiusut oqalussinnaanngilanga, taamaammat kammalaatikka atuaqatikkalu qaammatini siullerni qallunaatut oqaloqatigisarpakka, oqarpoq. Qaanaarmiusullu suli oqaluttarnerarlugu kisianni aamma kujataamiusut nipeqarnerulersimalluni.
Timersorneq inuuneraa
Bolethe Stenskov meeraanermini timersortuaannarsimavoq. Silami pinnguarneq, arlaatigut unammiffiulaartuaannartoq. Qimusserluni imaluunniit arpattagiarluni.
Angajoqqaavi aamma kulturikkut pikialaartitsinernilu allani suleqataasarput. Isikkamik arsarnermik tilluunnermillu soqutigisaqarput tv-kkut aallakaatitanik malinnaaffigisartakkaminnik. Ilaqutariit Nanortalimmut nuukkamik Bolethe timersoqatigiiffinnut assigiinngitsunut ilaasortanngorpoq. Isikkamik arsarneq misileqqaariarlugu taekwondo misilippaa.
- Meeraallunga Bruce Lee nuannarisorujussuuara, Bruce Leeusaartarnikuuvugut, illarpoq.
Ullut ilaanni paasivaa Nanortalimmukartoqarniartoq taekwondonermullu klubbimik aallartitsilluni.
Misilikkamiuk nuannarisorujussuuaa.
- Niviarsiarartatuaavunga nukappiaraaqqatullu sungiusartinneqartarlunga, illarpoq.
Kingorna taanna timersuut inuunerani ilaasorujussuuvoq, ilaquttani nalinginnaasumik atuanngiffeqarnermi peqatigineq ajorpai atuanngiffeqarnerummi nalaani timersornermi aaqqissuussat pisarmata.
- Ilaquttakka pingaarnersiuininni tullertut inissisimajuaannarput, unneqarilluni oqarpoq angerlaraangamili ilaquttani salliuttarnerarlugit.
Sulinngiffeqarnermini ilaquttani peqatiginerlugit eqqaamanngilaa. Sulinngiffeqarnermili ataatsimooraangamik nunatsinniissallutillu pinngortitamiinnissartik isumaqatigiissutigisarpaat. Sulinngiffeqarnermili angalassatillutik Bolethep kiattunut seqinnisaariarnissani misigisaqarnissanilu nuannarisarpaa.
Tapersersorteqarnissani piumasaraa
Bolethe Stenskov qatanngutigiinni pingasuusuni nukarlersaavoq – nukarliliaq. Qatanngutai ukiunik 13-inik arfineq-marlunnillu angajulliuneruppat, taamaammat peroriartoqatiginngilai. G-60-mut atatillugu Danmarkimut ilinniariartorput, taamaammat aasaanerani atuanngiffeqarnermi taamaallaat takusarpai. Inersimasunngoreerluni aatsaat iluamik attaveqarfigilerpai.
- Nukatsinneqartuaannarpunga. Tunissuterpassuarnik tunineqartarlunga, qatanngutini Narsami maanna najugaqartut pillugit oqarput.
Arnaat Frederikke Petrussen ernisussiortutut ilinniarnermini nalaanit Amandusimut katippoq. Ilinniarnini naammassinngilaa. Arnammi katikkaangamik ilinniarnertik nangeqqissinnaaneq ajoramikku. Peqqinnissaqarfimmili sulinini ingerlatiinnarpaa. Nutaaliullaqqippoq assassullaqqillunilu.
Bolethep inuusuttuulluni soqutiginartinngilai. Soqutiginartitani kiisisa pillugit arni malinnaavigisarpaa.
- Kingorna uggorisarpara. Ataataqarnerugami malinnaaviginerullugulu suliai, oqarpoq.
Bolethe ueqarpoq imminiit ukiunik marlunnik nukarlermik, Poul Stenskov, pingasunik erneqarput Minik, Nikki Mikkelilu.
– Uiga naapikkakku...
Bolethe illalerpoq oqaasissamilu tullia oqaatigissanerlugu nalornillugu. Nangipporlu:
- Tapersersunngippanga allamik ujarlissallunga oqarfigaara.
Illarnerulerpoq.
- Akueraa maannalu ukiut 30-t sinnerlugit katisimavugut, oqarpoq.
Illaqqilerpoq.
- Oqarnittuut suliffigerusutara pillugu juunip aallaqqaataani maanga nuuppugut, nassaannarparalu.
- Hahahaha!
- Tassa suliffissarsiortussanngorpoq, utoqqatserpaluttumik illalaarpoq.
