ACR tusagassiuutini

Arctic Circle Race 2010 nunarsuarmi tamarmi timersornikkut aallakaatitami Trans World Sportimi pingasunngorpat pitsaasumik eqqartorneqassaaq, TV2-mi Sisimiuni eqqaanilu nunarsuarmi ujakkaarnerit sakkortunersaat minutsit 8-t atorlugit aallakaatinneqalerpat.

Taama aallakaatitassiamik siammarterisoq Kalaallit Nunaanni Takornariaqarnermut Inuutissarsiornermullu Siunnersuisoqatigiit nalunaarput.

Sapaatip akunneri tamaasaTrans World Sporimi nunarsuarmit tamarmit aallakaatitassiat angusallu aallakaatinneqartarput. Aallakaatitassiami sammineqartarput timersutit sammineqarluartut ikittunillu sammineqartartut, isikkamik arsarnermiit sikkilernermut, snowboardernermiit skysurfingimut (silaannakkut sangusaarneq, aaqq.).

Trans World Sport nunani 138-usuni angerlarsimaffinni 250 milliardit missaanni isiginnaarneqartarpoq, taamaalilluni nunarsuarmi timersornikkut tv-kut aallakaatitanit nuannarineqarnerpaat ilaanniilluni.

TV2 Sportimi nutaarsiassanut pisortaq Bo Andersen oqaluttuarpoq aallakaatitaq pingasunngornermit sisamariarluni aallakaatinneqassasoq, siullermik akunnerup ataatsip iluani nunarsuarmit tamarmit aallakaatitsinermi, kingornalu naalisarlugu marloriarluni, naggataagut unnuarissanut takutinneqarluni.

Kalaallit Nuaanni Takornariaqarnermut Inuutissarsiornermullu Siunnersuisoqatigiit ukiuni sisamani kingullerni sulissutigisimavaat qaasuitsup killeqarfiata avannaani ujakkaarnerup immikkorluinnaq ittup nunarsuarmi tamarmi ilisimaneqalernissaa ACR-imi aqutsisut Branding Greenlandilu qanimut suleqatigalugit.