Champions League
Ajorsarujussuarneq annernartoq
Bayern Münchenip Champions Leaguemi Real Madridimut ajorsarujussuarpoq, ingerlariaqqittoqartariaqartorli tyskinit oqaatigineqarpoq
Bayern München arsaattarfimminni Europa Cupini annerpaamik isertitanik marlunnik ajorsarnikuuvoq, marlunngormalli 0-4-mik Real Madridimut ajorsarlutik.
Ajorsarujussuareernermi kingorna pissartaanertik illersorsinnaajunnaarpaat, Bayern Münchenimilu aqutsisut angusarineqartoq pakatsissutigaat.
- Unammisagut uagutsinnit pikkorinneroqaat, arsaqatigiissinnaajunnaarlutalu.
- Ajorsarnerput annernarpoq, ajugaarusussuseqartoqanngilarmi, timersoqatigiiffimmi pisortaq Karl-Heinz Rummenigge oqarpoq.
Ataqqinaatitut præsidentiusoq Franz Beckenbauerip ajorsarneq akueriinnartariaqarpaa.
- Real Madridikkut pikkorinnerugamik ajugaapput. Sapaatip akunneri siuliinisut Bayern München pissusissamissut arsaatinngillat, oqarpoq.
Timersornermut akisussaasoq Matthias Sammer isertitarineqartut siulliit marluk naammaginngilai, pitsaanerilli ajugaasut naqissuserlugu.
- Timersortartorpalaarluta Real Madrid pilluaqqusariaqarparput. Pissartanngorniunnernili peersitaanerput ajuusaarutigaarput, Bildimut oqarpoq.