Ajugaaniarlutik tamaviaartariaqarput
GOG Svendborg, kalaallinik nunanut allanut unammisartunik marlunnik, Minik Dahl Høeghimik aamma Jakob Larsenimik, arsartartulik ajoqusertoqarsimaqisoq Håndboldligami ajornikunut, Lembog Håndboldimut ajorsangajavippoq.
- Minik ullumikkut arsarluassaaq! GOG-ip sungiusaasua islandimiu Gumundur Gudmundsson unammineq sioqqullugu aningaasaliisunut oqarpoq. Ajoraluartumik sungiusaasup piumasarpiaatut pisoqanngilaq.
Minik isertitseriarnermini siullerni marlunni isertitsinngilaq, unamminerup immikkoortuata siullia qiteqquttorlu isertinneqarami, unamminerullu sinnerani Minik iluatsitsivallaanngilaq.
GOG-mi unammisartut arfineq-marluk ajoquseqqasimapput, taamaattumillu Lemvig sæsonimi siullermeersumik ajugaasinnaasimagaluarpoq.
Unamminerup naammassinissaanut minutsit tallimaannanngortut GOG 22 - 24-imik kinguarsimavoq, Lemvigilllu ajugaanissani qulakkeersimasinnaagaluarpaa. Periarfissaqaraluarput GOG-ermiulli tunniutiinnarumanngillat.
Tulleriisiinnarlugit pingasunik isertitsigami GOG ajugaasinnaanngoriataalerpoq. Isiginnaartut pikkusoqisut nikuillutik GOG-rmiut sukassarpaat. Lemvig 25 - 25-imut ajuuuppoq, taavali svenskeq Frederik Petersen qulissaa isertitsilluni GOG ajugaasippaa 26 - 25-imik.
- Ajugaavugut marlunnillu pointinnalluta. Unammineq taamatut pitsaanerpaamik oqaatigineqarsinnavoq, Jakob Larsen unamminerup kingorna oqarpoq nangillunilu: Sapaatip akunnerata naanerata tulliani Skjern unammissavarput. Qujanartumik tamatuma kingorna ulluni 14-ini unammissanngikkallarpugut, taavalu ajoqusernikuvut iluarsereersimassappput.
Jakob Larsen naammaginartumik unammivoq sisamanillu ajuulluni. Minutsinili kingullerni 20-ini marloriarluni anisitaavoq. Tamanna pissutigalugu sungiusaasup unamminerup immikkoortuata aappaani Jakob Larsen taamaallaat saassussinermi atortarpaa, pingajussaa anisitaaguni iseqqissinnaanngimmat.