Akissarsiutigalugu tilluuttartut nunatsinni siullermeerlutik unammilersut

Fight Club Nanoq Godthåbshallemi arfininngorpat 4. november tilluutsitsilerpat isiginnaartut naatsorsuutigisinnaavaat akissarsiutigalugu tilluuttartunik unamminissamik isiginnaassallutik.

Unammineq pingaarnermi tilluuttartoq kalaaleq Frank Madsen, maanna Aarhusimi najugaqarlunilu sungiusartartoq, aamma Rumæniamiu Octavian Gratii unammissapput. Fight Club Nanoq tusagassiorfinnut taama nalunaaruteqarpoq.

Nuummi tilluuttartut arfineq-marluk aamma Aarhusimi The Colosseumimi tilluuttartunik unammissapput.

Frank Madsen tilluunnissamut qilanaarpoq:

- Unammisassama unammineri takoreerpakka, periataallaqqissuuvoq sakkortuumillu tillussisinnaalluni. Tamanna pinngitsoortinniassavara. Qasutinniartussaassavara, taamaasillunga pointinnanniassallunga, Frank Madsen oqarpoq.

Don Maliko aliikkusersuissaaq

Fight Club Nanoq tilluutsitsissaaq arfininngornermi nal. 19.00-miit, matulli ammarneqariissapput nal. 18.00.

Unamminerit akunnerini Don Maliko x Toornat tusarnaartitsisassapput. DJ Qulutaq aamma tusarnaartitsissaaq unamminerlu kingulleq aallartitsinnagu Ulla Fleischer nunatta erinarsuutaanik atuissalluni. Unammisussanik saqqummiisuussaaq Kim Jakobsen.

Frank Madsen Kalaallit Nunaanneersoq aamma Octavian Gratii Rumæniameersoq naatsorsuutigineqarput nal. 21.30 unammillutik aallartissasut. Unammineq arfinilinnut agguarneqarsimavoq, tilluunnerit minutsinik pingasunik sivisussuseqartinneqassallutik.

- Unammisoqarnissaanut nittarsaassisoq Mahmoud Minaei, Fight Club Nanumi unammisoqarnissaanut pilersitsineranut qutsavigissavarput, kajumissutsimik suliaqartut aningaasaliisullu aamma qujaffigaagut, taakkoqanngippata unamminissat piviusunngorsinnaanavianngimmata.

Tilluuttussat Nuuk Centerimi tallimanngornermi nal. 16.00 ilisaritinneqassapput.