Akutaaneq kingumut arsarluaqaaq
Akutaaneq Kreutzmann aamma Vejlemi sungiusaasoq Mads Brandt ukiup unammiuaarfiup naammassinerani suleqatigiinnertik taamaatissavaat
Qallunaat assammik arsarnermi 1. divisionianni kikkut pitsaanernut kikkullu pitsaannginnernut ingerlaqqissanersut unamminerit ataasiakkaat ingerlanneqareerpata paasinarsissaaq.
Timersoqatigiiffit kalaallinik unammisartullit tamarmik qanoq pinissaat inissitsitereerput.
Akutaaneq Kreutzmann aamma holdeqataasa ungasiliarlutik Lollandimi Maribomi Team Sydhavsøerne unammiartorpaat. Nalinginnaasumik Vejlep holdi Lollandimeersoq ajornartorsiutigineq ajorpaa. Taamaattoq sapaammi taamannak pisoqanngilaq qeqertaararmiut 26-23-mik ajugaagamik.
Akutaaneq Kreutzmann sivuumik angalagaluarluni - bussimik siumut utimullu 14 tiimit - kingumut unammilluaqaaq arfineq-pingasunik pingaaruteqarluartunik isertitsigami.
- Ajunngitsumik ingerlavugut. Team Sydhavsøerne sukalasorujussuupput minutsillu kingulliit tikillugit malinnaaniarpugut, qasusuuvilluta kukkusaqattaarlutalu. Uagut holditsinni piginnaanillit ikinnerupput uanmmiuaaqatigisartakkavut pitsaanerit sakkortunerillu angummaffigisinnaanagit, Akutaaneq Kreutzmann Sermitsiaq.AG-mut sivisoorsuarmik bussereerluni oqaluttuarpoq.
Vejle Håndbold 1. divisionimi normu 5-itut inissisimavoq Håndboldligamut anngutinngitsoorlutik. Akutaaneq Kreutzmann aamma Vejlep sungiusaasua Mads Brandt siornatigut nalunaarput ukioq unammiuaarfik una naappat Vejle Håndbold qimanniarlugu. Taakkuali tamarmik suli naluaat sumiilissanerlutik.
HIK
Finn Lynge Frederiksen HIK-imi ilani peqatigalugit aamma ungasiliarput. Københavnimit Skivep eqqaanut Stoholminut 35-23-mik ajorsariartorlutik angalapput.
HIK 1. divisionimi kingullikuupput kingumut 2. divisionimut utissallutik siornaak unammiuaarfigisaminnut.
Finn Lynge Frederiksen sapaatiummat målimik ataatsimik isertitsivoq ajornernullu ingerlaqqinnissartik ajuasuutiginagu.
- Ukiup tullissaanut qilanaalereerpunga unammeqattaaqqilernissatsinnut. Soorunami kajumissuseqartuaannarnissaq ilungersunarsimavoq ajorsartuartuarnikuugatta, Finn Lynge Frederiksen Sermitsiaq.AG-mut oqarpoq.
HIK-mi pisortat anguniarpaat 2. divisionimi ajugaanissartik 1. divisionimut uteqqinniassagamik.
GOG
Aamma fynimiut sapaammik ungasiliarput. Arsaqatigiit angusarissaarluartut håndboldligamut anngutereersut ajornikut HRH 74, Skivep eqqaani Roslevimiittunut tikeraarput. GOG qularani ingerlatsivoq 19-25-mik ajugaallutik. GOG-mit Minik Dahl Høegh peqataanngilaq taanna Kangerlussuarmi sikumik arsarnermi peqataavoq Nunatsinnut tapersuiniat arlaannut ilaalluni.