Akutaaneq Kreutzmann angakkuaqqittoq
Akutaaneq Kreutzmann kingumut isaatitsinerpaavoq qallunaat 1. Divisionianni Vejle Håndbold HC Midtjyllandimut naligiilllutik unammineranni
Unamminerup aallartinnerani Vejle Håndboldip unamminerup naammassinerani pointinnallutik naammassinissaat naatsorsuutigineqanngilluinnarpoq. Minutsit 16-it ingerlareersut Vejle Håndbold taamaallaat ataasiinnarmik isertitsisimapput 1-7-imik kinguaattooqqapput.
Minutsit ingerlaneranni Vejle Håndbold unamminerat pitsanngoriartuinnarput unamminerup nikinnerani målinik pingasuinnarnik kinguaattooqqallutik 10-13.
Naggatissaa tikillugu pissanganeq
Unamminerup immikkoortuata aappaa pissanganarlunilu arsarluarnermik takutitsineruvoq. Vejle Håndboldip ajugaasinnaanermut periarfissani takoriataarpaa iluatsitsilluarunillu pointit marluk pissarsiarineqarsinnaallutik ilami Vejlemit arsartartut arlaleriarlutik unamminermik aalajangiisuusinnaanertik takugaluarpaat. Minutsit kingulliit pissanganartorujussuupput ajoraluartumik periarfissatsiarsuit qatangiinnartinneqarlutik tamarmillu arsanik arlalinnik annaasaqartarlutik. 23-23-mik naligiiginnarneq inerneruvoq naapertuuttoq arsartut tamarmik naammagisimaarsinnaasaat.
Vejlemut pitsaanerpaaq
Akutaaneq Kreutzmann arsarluaqaaq. Unamminerup annersaani isertitsilluartarluni. Tunniussisarnerit eqqarsaatigilluakkat pitsaasullu titarnerup sinaanit avataanniillu arfineq-marlunnik isertitsissutaapput. Unamminerup naammassinerani Akutaaneq Kreutzmann naammagisimaarinnilluarpoq imalu Sermitsiaq.AG-mut oqarluni:
- Unamminermi aallartinnerlukkaluarluta isertitsinerlu ajuleqqagaluarluta isumaqarpunga annguteqqilluartorujussuusugut uangalu nammineq imminut naammagisimaarluarpunga.