Angutimmariup Muusallu nukappissat U-20 VM-imut peqataasalernissaannut aqqutissiuussavai
Assammik arsaattartut nukappissat U-20 sungiusaasortaarput. TAAK nunanut allanut unammisartuusimasunik marlunnik sungiusaasunngortitsilluni isumaqatigiissuteqarpoq. Taakkua nunanut allanut unammisartut nunarsuarmi pissartanngorniutsitsinernut peqataasarnissaq anguniassavaat.
Angutimmarik Kreutzmann aamma Muusa Ostermann-Søholm assammik arsaattartunut nukappissanut U-20-nut sungiusaasunngorput.
TAAK tusagassiorfinnut taama nalunaaruteqarpoq.
- Angutimmarik Kreutzmann aamma Muusa Ostermann-Søholm nunanut allanut unammisartussanut nukittuumik tunngaviliisuussapput. Assammik arsaannermik misilittagaqarluartuupput, nunanullu allanut unammisartuusimallutik, kattuffik tusagassiorfinnut nalunaaruteqarluni allappoq.
- TAAK nunat tamalaat assammik arsaattartuisa kattuffiat aqqutigalugu inuusuttut nunanut allanut unammisartuisa nunarsuarmi pissartanngorniunnissanut peqataanissaannut periarfissangissaartitsilerpoq.
Sungiusaasut misilittagaqarluartut
TAAK-ip tulluusimaarutigaa timersuummi misilittagaqarluartut sungiusaasorileramigit. Sungiusaasunngortut nunarsuarmi pissartanngorniunnernut peqataanermik misilittagaqarput.
- Unammisartunik arlalinnik toqqaanissaq tullinnguuppoq, taakkulu piginnaasaannik qaffassaanissaq tulliussalluni. Taamaasilluta nunanut allanut unammisartut nukittuut anguniassagatsigit, kattuffik allappoq.
Nunarput amerika avannarlermi puljemiippoq, nunarsuarlu tamakkerlugu pissartanngorniunnermut peqataanissamut periarfissagissaarluni.
VM anguniagaavoq
- Nunanut allanut unammisartooqataaneq ineriartuutaalluartarpoq. Tatisimaneqangaatsiarnermi pitsaasumik angusaqarnissamik piumasaqaateqartarpoq, unammisanullu ikinngutaalluarnissaq aamma piumasaqaataasarluni.
Nunarsuarmi pissartanngorniunneq anguniarneqarpoq, nunanullu allanut unammisartunut inersimasunut peqataatitaqartitaqalertarnissaq aamma anguniagaalluni, TAAK allappoq.
Niviarsissat U-20-t sungiusaasoqalernissaat aamma sulissutigineqarpoq. Sungiusaasoqatigiit periusissaat tulliullugu inissinniarneqarumaartoq, aamma nalunaarutigineqarpoq.