Angutimmariup Tysklandimi unammisartunngornera
Assammik arsartartoq Angutimmarik Kreutzmann Tysklandimi timersoqatigiiffittaamini Eintracht Hildesheimimi sungiussilluarpoq Sverigemiillu Tysklandimut nuunnerminik uggorinninnani
Upernaaq OV Helsingborg Sverigemi unammisartut pitsaanerpaartaannut qaffanngitsoormat Angutimmarik Kreutzmann Sverigemi unammisartuujunnaarniarluni aalajangerpoq.
Tysklandimi unammisartutut ingerlaqqinnissaq suli aalajangiunneqanngitsoq arlalinnik periarfissaqarpoq.
Angutimmarik Kreutzmanni Eintracht Hildesheim ukioq kingulleq Bundesligamiikkunnaartoq maannalu Tysklandimi pitsaanerit tullianni 2. Bundesligamiilersoq isumaqatigiissusiorfigaa.
- Maaniilluni nuannersorujussuuvoq, Angutimmarik Kreutzmann naammagisimaarinnippaloqaluni oqarasuaatikkut Hildesheimimit Sermitsiaq.AG-mut oqaluttuarpoq.
- Timersoqatigiiffiup nunarsuarmi ligat nukittunerpaartaannut Bundesligamut uternissani upernaaru piviusunngorsinnaassasoq neriuutigaa. Sungiusartorujussuuvugut ukiullu unammisaqattaarfiusup ingerlanerani arlalippassuariarluta unammissalluta. Sapaatip-akunnerata naanerani unammeqqaaratta 2000-inik isiginnaartoqarpoq. Tysklandimi timersornermi atuagassianit angisuunit qaffannissamut ilimanaateqarluartut ilaattut suaarutigineqareerpugut.
Angutimmarik Kreutzmann inuttut aamma ingerlalluarpoq nuannersumik ineqarluni biileqarlunilu.
Eintracht Hildesheim
Eintracht Hildesheim assammik arsartartunik tamatigoortunik 21-nik unammisartoqarpoq. Qallunaat marluk Michael Hoffmann aamma Michael Quist taakkua akornanniipput. Unamminermi siullermi Eintracht Hildesheim HC Empor Rostockimut 36-25-mik ajugaavoq muminnissamut unillatsiarnermi 19-8-imik siuaqqareerluni. Angutimmarik Kreutzmann marloriarluni isertitsivoq minutsillu 35-t missaanni arsaqataatinneqarluni.
2. bundesligami timersoqatigiiffiit 20-nik amerlassuseqarput, taamaattumik unammiuaarneq juunip arfineq-pingajuani 2013-imi naatinnagu Angutimmarik Kreutzmann unammisartoqataalu katillugit 38-riarlutik unammissapput. Normu 1, 2 aamma 3 Bundesligamut qaffassapput.
Kangaamiunit Hildesheimimut
Angutimmarik Kreutzmannip ilaqutai Kangaamiunit kingoqqisuupput. Assammik arsartartut ilinniartinneqarnera siulleq Maniitsumi pivoq. Danmarkimi timersoqatigiiffiit pingasut Silkeborg-Voelip, Bjerringbro-Silkeborgip aamma Odder Håndboldip tamarmik Angutimmarik Kreutzmann unammisartorisimavaat.
Qallunaap sungiusaasup nunanullu allanut unammisartuusimasup Ian Marko Fogip Angutimmarik Kreutzmann Sverigemut nuutsippaa, tassanilu ukiuni marluni OV Helsingiborgimiilluni Eintracht Hildesheimimut nuunnginnermini.
Hildesheim illoqarfiuvoq alianaalluinnartoq 100.000-it sinnilaarlugit innuttaqartoq Tysklandimilu naalagaaffiup immikkoortortaani Niedersachsenimi Hannoverimit 30 kilometerinik kujammut-kangisinnerusumiilluni.