Angutit assammik arsartartut ajugaalluavipput
Assammik arsartartut angutit franskit 3. divisioniannit Villeneuvemeersut unammigamikkit 30-25-mik ajugaapput.
Misiligutitut sungiusaataa aappassaanik unamminermi Kalaallit Nunaata franskit 3. divisioniani holdit Villeneuvemeersut unammigamigit ajugaaffigai. Inerneraa 30-25 unillatsiarnermi 12-11. Sungiusaatigalugu unammilluavipput, naak ilaatigut sakkortuumik pisoqartaraluartoq.
Taamak oqaluttuarpoq GHF-imi siulittaasup tullia, John Jakobsen.
Minik Dahl Høegh unamminerup immikkoortuata aappaata qiteqqunnerani pingajussaanik anisitaavoq, taamaalilluni kortimik aappaluttumik tunineqarluni.
- Kalaallit unammisartuisa assigiinngitsunik piginnaaneqarnertik takutippaat, tamanna aamma isertitsinerni takuneqarsinnaavoq unammisartut tamarmik isertitsigamik. Aamma unioqqutitsivallaartaratik unammipput, soorlu arlalitsigut aamma saassussilluartartut.
Unammilluarnerpaavoq Miilu Rosing. Franskit assersuisartut akornanni arsarluartarpoq, Nunattalu isertitsinerpaartaraat arfineq pingasunik isertitsigami. Aamma Minik Dahl Høegh arlalitsigut arsarluarpoq, saassussinerni tamani akeqqaminut ulorianartorsiortitsisarmat, John Jakobsen oqarpoq.
Pingaarnerpaavorli unammisartut tamarmik arsartinneqarmata. Misiligutitut unamminissaq kingulleq tallimanngorpat pissaaq, tassani nunatta franskit pitsaanerpaat rækkiini pingajussaanni holdit unammissagamikkit.
Nunatta isertitsisui:
Miilu Rosing 8
Minik Dahl Høegh 4
Jakob Larsen 3
Muusa Osterman Søholm 2
Aqqaluk Sørensen 2
Andreas Lorentzen 2
Danny Brandt 2
Miki Heilmann 2
Angutimmarik Kreutzmann 1
Rasmus Larsen 1
Johannes Groth 1
Erik Motzfeldt 1
Unamminermi peqataanngitsut tassaapput Hans Peter Motzfeldt aamma Eqalunnguaq Kristensen.
Nunatta assammik arsartartuisa sungiusaasuata Jakob Andreasenip unammineq naammagisimaarluarpaa - oqarporlu unammineq naammassereermat:
-Unamminermi pitsaaqutaavoq unammisartut tamarmik arsartinneqarnerat. Unamminerullu immikkoortuani siullermi naligeereerluta unamminerup immikkoortuata aappaani pitsaanerulerpugut. Assersuisartut ilaatigut pitsaalluinnartumik assersuisarput - neriuppugullu tallimanngornermi misiligutitut kingullermik unamminissatsinni assersuisarnerput aamma saassussisarnerput pitsaanerpaamik pissasut.