Angutit unamminissaat kinguartinneqarpoq
Assammik arsarluni unammisaqattaarnissamut Herre Cup-imut peqataaniarlutik nalunaartut ikippallaarput.
Angutit assammik arsarlutik unammisaqattaarnissaannik aaqqissuussisut aalajangerpaat tamanna februaarimut kinguartinniarlugu, ullussaalli suli aalajangerneqanngilaq.
– Tamanna patsiseqarpoq klubbinik tapersersorneqarpiannginneranik, naak ukiup affaa sioqqullugu peqataaqqusissutinik nassitsereeraluartugut, Jens Bang aaqqissuussisut, NÛK, sinnerlugit Sermitsiaq.AG-mut taamak oqarpoq.
Taamaallaat GSS aamma NÛK peqataaniarlutik nalunaarput unamminissamut siorna holdit sisamat peqataaffigisaanik ingerlanneqartumut.
– Maanna neriuppugut klubbinit allanit peqataaffigineqarumaartoq februaarimi ingerlakkutsigu. Aamma maanna misissorparput Islandimit holdinit peqataaffigineqarnissaanik periarfissaq, Jens Bang oqarpoq.
GSS siorna ajugaavoq GMS Herre Cup-imi, tassani NÛK hold 2 ajugaaniutivinnermi ajugaaffigimmatigik, NÛK hold 1 bronzennapput, K-33 Qaqortumeersut ajugaaffigalugit.