Arctic Circle Race apriilimi ingerlanneqassaaq
Arctic Circle Race-t 15-issaat apriilip 8-anniit 10-annut ingerlanneqassaaq.
Arctric Circle Racemik ingerlatsisut Arctic Circle Race-t 15-issaasa qaqugu ingerlanneqarnissaa aalajangerpaa, tassani pisarnertut ulluni pingasuni 160 kilometerimut sisoraatinik oqilaniuttoqassalluni. UNammineq, nunarsuarmi unamminerit sakkortunersaattut taaneqartartoq, Sisimiuni ingerlanneqassaaq apriilip 8-anniit 10-annut.
Aamma periarfissaqassaaq ulluni taakkunani pingasuni 100 kilometerimut arpannissaq. Peqataasut ulluni martlunni Campen-imi unnuisassapput. Arctic Circle Racep ukiunik 15-inik nalliuttorsiornissaa siulersuisut nuannaarutigaat, nalunaarlutillu nalliuttorsiorneq immikkut ittumik malunnartinneqarumaartoq.
- Nunani tamalaani tusagassiorfissuarnit ACR soqutigineqartorujussooqqippoq. Assersuutigalugu Trans World Sport-ip 2010-mi ACR malinnaaffigaa aallakaatitassiaralugulu. Taamaasilluni nunat assigiinngitsut 138-it ACR 2010 malinnaaffigisinnaasimavaat, naatsorsuutigineqarporlu inoqutigiit 250 millionit unammineq malinnaaffigisimagaat. Trans World Sportip aallakaatitassiaa youtube-mi takuneqarsinnaavoq, Arctic Circle Racemik aaqqissuussisuneersoq Jens Klaus Lennert oqarpoq.
Arctic Circle Race 2011-mik aningaasaliisooqqissapput Qeqqata Kommunea, Air Greenland A/S aamma Igloo Mountain. Aamma Branding Greenland Arctic Circle Race 2011-mik pingaarnertut aningaasaliisuussaaq.
- ACR-mut taamaattunik aningaasaliisoqarnera pingaaruteqarpoq, tamakkoqanngitsuuppat aaqqissuussineq ukiuni taama amerlatigisuni ingerlassinnaasimassanngikkaluarparput. Minnerunngitsumik ukiut tamaasa piumassutsiminnik ikiuuttartut suliarujussuinut annertuumik qutsavissaapput, Jens Klaus Lennert oqarpoq.