Arctic Circle Race aqqaneq marlussaannik ingerlanneqassaaq
Arpannersuaq kulturimut silaannaap pissusianut aammalu ataatsimoornermut tunngatinneqassaaq.
– Amerlasuut isumaqarput ACR-i pikkorinnerpaaginnaat arpaffigisaraat. Ukiumi nutaami peqqinnerorusukkuit, inuummarinnerorusukkuit qiimanerorusukkuillu, taava Arctic Circle Race-mut peqataanissannut qanoq iliuuseqarlutit sungiusarit.
– Matumani allat peqatigalugit – immaqa suleqatit ikinngutilluunniit – qanoq iliuuseqarnissannut periarfissaqarpoq, siulittaasoq Ellen Kreutzmann oqarpoq.
Ukiuni makkunani kalaallit kulturiat, silaannaap pissusiata allanngoriartuinnarnera nunarsuarmioqataajartuinnarnitsinnut malunniukkiartorput, ukioq mannalu arpannersuarmi sammisaassapput namminneq piumassutsiminnik ikiuuttartut arpannersuarmilu peqataasut ataatsimoornerat.
Arctic Circle Racip ukiut tamaasa nunatsinnit nunanillu allaneersut amerlasoorpassuit soqutiginnitsigisarpai, nunatsinneersullu ukiumiit ukiumut amerliartoraluartut ukioq manna siulersuisut anguniarpaat nunanit allaniit peqataasartut suli marloriaammik ukiuni kingullernut sanilliullugu amerlassuseqalissasut.
ACR ilisimaneqarpoq nunarsuarmi sisoraatinik arpannermi ilungersunarnerpaasoq nunat tamalaat akornanni arpattartut ilisimaneqartut peqataaffigisartagaat.
Ukiuni kingullerni 80-120-nik amerlassusillit nunatsinnit nunanillu allanit peqataasarsimapput. Arpannersuaq apriilip 1-aniit 8-anut 2008 ingerlanneqassaq.