Arctic Circle Race qanilliartorpoq
Arctic Circle Race-mut, nunarsuarmi unamminerit sakkortunersaattut taaneqartartumut, peqataanissamut nalunaarnissamut killissarititaq tallimanngornermi marsip 5-ianni naassaaq.
Arctic Circle Race-t 14-issaat iluamik aallartinnialeruttorpoq. Marlunngormat februaarip 23-ianni Sisimiuni piareersaataasumik ataatsimiittoqarpoq piumassutsiminnillu suleqataarusuttorpassuit takkussimapput, tassanilu ikiuukkumasut nalunaarsinnaapput.
Piumassutsiminnik suleqataasartut aalajaatsut amerlasuut ataatsimiinnermut takkussimapput, aammattaarli nutaarpassuit takkussimallutik, ilaatigut HTX-imi ilinniagaqartut. Arctic Circle Race ukiut tamaasa 200-t angullugit piumassutsiminnik ikiorteqartarpoq, unamminerullu nalaani 130-150-it ikiuuttarlutik.
Ukioq manna Arctic Circle Racemut peqataaniarlutik nalunaarsimasut nunanit assigiinngitsunit 13-ineersuupput.
Nunallu allamiut tusagassiorfii soqutiginnittorujussooqqipput, tamakkualu Arctic Circle Racep piumassutsiminnik sulisuisut, aningaasaliisuisut suleqatigisaatullu pinngitsoorneqarsinnaanngitsigaat. GTE (Kalaallit Nunaanni Inuussutissarsiornermut Takornariaqarnermullu Siullersuisoqatigiit) tusagassiortunik/assiliisunik nunanit tamalaaneersunik Arctic Circle Race-mik malinnaaasussanik ikiuutissaaq.
- Pisarnertut Air Greenland ukioq manna angisuumik aningaasaliisut ilageqqippaat, ukioq mannalu aamma angisuumik aningaasaliisumik allamik isumaqatigiissuteqartoqarsimavoq, tassalu Igloo Mountain. Piumassutsiminnik ikiuuttorpassuit, aningaasaliisut minnerunngitsumillu suleqatigisat soorlu Qeqqata Kommunia peqataatinnagit aaqqissuussineq ingerlanneqarsinnaanngilaq. Nuannersorujussuuvoq ukiut tamaasa peqataaqqittartorpassuaqarmat, piumassutsiminnik ikiuuttutut unamminermiluunniit peqataasutut. Apriilimi tikeraartutta tikilluaqqunissaannut qilanaartorujussuuvugut, Arctic Circle Race-p siulittaasua Jens Klaus Lennert oqarpoq.
Arctic Circle Race ukioq manna ingerlanneqassaaq apriilip 9-anniit 11-iannut.