Arctic Circle Race suli soqutigineqartorujussuuvoq
Aappaagu Arctic Circle Race-mut peqataajumasunik nalunaartoqartalereerpoq.
Arctic Circle Race 2010 aprilip qulingiluaanniit 11-iannut ingerlanneqassaaq aaqqissuisartullu nunanit allaniit soqutiginnittoqalereernerarpaat.
– ACR 2010-imut peqataajumasunik nunanit allaniit nalunaartoqartalereerpoq. Oqartariaqarpugut suli soqutiginnittoqartorujussuusoq, tassami decemberimi januarimilu aatsaat nalunaartoqalersaraluarpoq, massakkulli september/oktoberimili nalunaartoqartalerpoq, Arctic Circle Racep siulersuissuisa siulittaasuat Jens Klaus Lennert oqarpoq.
– Nunani allani tusagassiuutit ACR sammisorujussuusarpaat, pingaartumik tusagassiorfissuit ZDF-ikkut BBC-llu ACR-imiit aallakatitassiornerisa, silarsuarmilu timersornermut tunngasunik aallakkaatitassiorfiit arlallit aallaktitassiornerisa kingorna. Tamannalu aamma allanut sunniuteqarsimavoq, soorlu takornariartitsiviit ACR/Sisimiut angallavissaqqissutut misigisassarsiorfissaqqissutut isigilersimavaat, silarsuarmi pinngortitarsuup alianaannersaani, Sisimiut eqqaanniittumi atornartunik atugaqarluni sisorartarneq eqqarsaatigalugu, Jens Klaus Lennert unnersiorpoq.
Arctic Circle Race aprilimi ingelanneqarmat silarlunnera pissutaalluni unammineq takissusissaa tamakkerlugu ingerlanneqanngitsoorpoq. Tamatumali kingunerisaanik aatsaat taama sakkortutigisumik ingerlatsisoqarpoq, peqataasut 122 kilometerit ulluni marluinnarni ingerlasussanngormatigit.
ATUARUK ALLAASERISAQ: ACR--it sakkortunerpaartaat
Massakkut pilersaarutaavoq ingerlaarfissaq 160 kilometerinik isorartussusilik ulluni pingasuni ingerlaarfigineqassasoq, peqataasullu immikkoortup kingulliup ingerlaarfiginnginnerani marloriarlutik tupermi unnueqqaassapput, peqataasullu Minngortuunnguup Tasiani inuppassuarnit tikilluaqquneqarumaarput.
Arctic Circle Race Qeqqata Kommuniata Air Greenlandillu suleqatiginerisigut ingerlanneqassaaq.
ATUARUK ALLAASERISAQ: Niviap ajugaanera.