væk fra skandaler
Arctic Sports Greenland: Hashi imatut iliuuseqarfigisarparput
Timersoqatigiit kattuffiata ataani kattuffiit ilaasortat nutaanersaat Arctic Sports Greenland ujartuivoq timersuutit tamarmik assigiimmik ikiaroornartumut imigassamullu politikkeqalernissaannik
- Uagut imigassamut ikiaroornartumullu politikkerput malillugu atornerluisut mattutivinnissaat siunertarinngilarput iluannillu katsorsartinnissamik pisariaqartitsippata ikorfartornissaat taamalu timersortartuuinnarnissaat anguniagaraarput.
Arctic Sports Greenlandimi siulittaasoq Helga Nielsen taama nalunaarpoq ullut kingulliit arsaannermi GM-rtuni imigassamik ikiaroornartumillu kanngunartuliat saqqummerarmata.
Taassuma siunnersuutigaa timersoqatigiit kattuffiata ataani ataatsimoorussamik timersuutinut tamanut atuuttumik imigassamut ikiaroornartumullu politikkeqalertariaqartoq.
- Kattuffitsinni immitsinnut pisussaaffilernikuuvugut imigassamik ikiaroornartumillu atornerluisut ikiornissaannut. Inunnik isumaginnittoqarfimmut katsorsartinnissamulluunniit saaffiginnissappata tapersiinissamut piareersimavugut, Helga Nielsen oqarpoq.
Taamaattoq suli ujartorpai atornerluisoqartillugu malitsigitinneqartussat pillugit kattuffiit tamarmik assigiinnik malittarisassaqarnissaat.
- Timersuut suugaluarpalluunniit tamatta assigiippugut. Tamatta assigiimmik eqqorneqartarpugut imigassamik ikiaroornartumillu atornerluisoqartillugu taamaammat tamatta assigiinnik malittarisassaqartariaqarpugut, Helga Nielsen oqarpoq.
Taanna maanna GIFip ataani kattuffinnut siunersuuteqarpoq tamatuma ataatsimoorussamik politikkeqarfiginissaanik. Arctic Sports Greenland aamma piareersimasoq politikkimik allanut agguaanissaminut.
Taanna Qaasuitsup Kommuniani pitsaaliuinermi ataqatigiissaarisutut atorfeqarpoq. Siorna kattuffiit arlallit isumaqatigiissuteqarfigaat Qaasuitsup Kommuniani ingerlanneqartumik pissartanngorniuttoqartillugu pitsaaliuinermik suliaqartoqartassasoq.