Argentinamut unammilluarput
Angutit nunanut allanut unammisartut Panamerikamiut pissartanngorniunneranni aappassaanik unamminerminni Argentinamut 18-24'mik ajorsarput
Unamminermi ajorsaqqammerluni nuannaarneq ajornartarpoq. Kisianni Argentinamut unamminerup kingorna nuannaarnissamut pissutissaqarpoq, aatsaammi Kalaallit Nunaat Argentinamut unammisaleramili taamak angusarissaartigaaq.
Kalaallit Nunaat sussaanngitsumik aallartippoq. Minutsit 15'it ingerlareersut aatsaat Kalaallit Nunaat siullermeerluni isertitsivoq. Minik Dahl Høegh siullerpaalluni kalaallit isertitsisoraat. Minutsit taakkua ingerlaneranni Argentina arfineq-marloriarluni isertitsivoq - tassa 7-1'imik siuaqqalluni.
Minutsit 15'it siulliit Kalaallit Nunaat isertitsinissamut ajornartorsiuteqarpoq. Argentinamiut illersuilluaqaat målimiittuallu Matias Schulz pitsassuulluni. Tassaanngaannarli unammineq allanngoriataarpoq. Kalaallit Nunaata illersuisui iluatsipput akulloqqutassaajunnaarlutik. Måliniittup Michael Lukasc, argentinamiut isertitseriaraluartarneri annaallualaavittarpai - tulleriiaaginnarnik annaassilluartarluni.
Unamminerup immikkoortuata siulliup naajartornerani Kalaallit Nunaat tupaallannartumik siuaqqalerpoq. Piffissami tassani Kalaallit Nunaat 7-3'mik pitsaanermik ingerlatsigaluarpoq nikinnermi Argentina 10-8'mik siuaqqalluni. Pingaartumik Minik Dahl Høegh aamma Miki Heilmann, argentinamiut qarmarsuanik akulloqquteriallaqqipput. Qatanngutigiit Larsen, Jakob aamma Rasmus illersuilluariarmata unamminermilluaqqilerneq erserpoq.
Argentina
Unamminerup immikkoortuata aappaa Akutaaneq Kreutzmannip isertitsineratigut aallartinneqarpoq, tassanngaannarlu Kalaallit Nunaat qanillattulerpoq, tassalu 9-10 anguneqarluni. 10-11'nngorpoq taavalu Argentinamiut arsarlualerlutik. Unamminerup immikkoortua aappaani minutsit qulit ingerlareersut målinik arfinilinnik siuarput siuarnerlu taanna kingorna allanngortinneqaqqinngilaq.
Minutsit 20't tullii unammisut paarlakaajaallutik isertitsisarput. Argentina 24-18'imik ajugaapput kisianni Kalaallit Nunaata argentinamiut aatsaat taamak unammilluartigai. Unammisut tamarmik unammineq pissarsiffilluaqaat assammik unammineq kusanartoq.
Puigorneqassanngilaq Argentina pitsassuummata. Qaammat ataaseq missaat qaangiuppat Tuluit Nunaanni OL peqataaffigissavaat panamerikamiullu pissartaraat. Taamaattumik kalaallit unamminerat eqqarsaatissaavoq inerneq tulluussimaarutaasariaqarpoq pitsassuummat.
Unammeqatigiit arlalitsigut takutitsilluarput. Målmandi Michael Lukasc arsarluaqaaq. Minik Dahl Høegh aamma Miki Heilmann arsarusussuseqarput qanorlu piginnaaneqarlutik takutillugu. Qatanngutigiit Rasmus aamma Jakob Larsen illersuisuni suleqatigiilluaqaaq.
Unamminermi minutsit 15'it siulliit eqqaassanngikkaanni Kalaallit Nunaat 0-7'imik kinguarsimanera eqqarsaatigissanngikkaanni minutsini 45 kingullerni 18-17'imik ajugaapput. Tamanna eqqarsaatigineqartariaqarpoq immaqalu ukiuni arlalinni aatsaat taamak pitsaatigisumik arsaattoqarpoq.
Ippassaq unnukkut Buenos Aires'imi ammaanersiortoqarpoq. Kingusinnerusukkut allaaserisami taanna eqqartorneqarumaarpoq tassani nunanut allanut sungiusaasup kalaallit takutitaat oqaaseqarfigissavaa.
Unamminermi kisitsisit:
Argentina – Kalaallit Nunaat 24-18 (10-8)
Målertut:
Kalaallit Nunaat: Minik Dahl Høegh 7 (1), Miki A. Heilmann 6, Angutimmarik Kreutzmann aamma Akutaaneq Kreutzmann tamarmik 2 kiisalu Andreas Lorentzen 1.
Argentina: Federico Fernandez 6, Mariano Canepa 3, Sebastian Simonet, Diego Simonet, Andres Kogovsek, Juan Manue Vazquez, Fedicio Vieyra aamma Guido Riccobelli hver 2, Pablo Portela, Leonardo Querin, aamma Gonzalo Carou tamarmik 1.
Anisitaasut:
Kalaallit Nunaat: 4 X 2 minutsit. (Rasmus Larsen, Jakob Larsen, Miki Heilmann aamma Andreas Lorentzen).
Argentina: 6 X 2 minutsit. (Federico Fernandez aamma Leonardo Querin tamarmik 2 X 2, Federico Vieyra aamma Guido Riccobelli).
Dommerit: Pinto Rogerio aamma Menezes Nilson, Brasilien.
Isiginnaartut: 1000