Armstrong Bjarne Riisitut iliorsimavoq
Lance Armstrongip nukkassaatinik atuisimanerminik nassuernermini allanik nakkaatsitseqataanngilaq, sikkilinik timersornermik ilisimasalik naliliivoq
Unnuaq tv-kut apersorneqarnermini Lance Armstrong nukkassaatinik atuisimanerminik tamakkiisumik ammasumillu nassuinngilaq, sikkilertartup tusaamasap ukiuni arlalinni epo-nik nukkassaatinillu allanik atuisimanini nassuerutigigamiuk.
Taamatut naliliivoq tusagassiortoq Lars Werge, taassumalu ukiorpassuarni Tour de France malinnaaffigisimavaa Lance Armstrongimullu nukkassaatinik atuisimaneranik unnerluussutit qanimut sammisarsimallugit.
- Tamakkiisumik nassuernermi aamma oqaatigineqassaaq nukkassaatit kimit pisiarisimanerlugit kiallu kapoortarsimaneraani. Mannalu taamatut oqaatigineqarsinnaanngilaq, Lars Werge Ritzau-mut oqarpoq.
- Nassuerutai Bjarne Riisip nassuerutaatut ipajaarput. Nammineq ajortuliorsimanini nassuerutigaa, tamaangaannangajallu killeqarpoq. Holdeqatini nakorsalluunniit oqaluttuarinngilai, sikkilerluni timersornermik ilisimasalik oqarpoq.
Atuaruk "Armstrong nassuerpoq: Imatut oqarpoq"
Atuaruk "Armstrong Oprah-mit apersorneqareerluni: Suut tamarmik saqqummiunneqarput"
Lars Wergep tikkuarpaa Lance Armstrongip ilisimalluinnarpasikkaa talkshowimi ingerlatsisumut Oprah Winfreymit tv-mi apersorneqarnermini qanoq oqarusunnerluni qanorlu oqarusunnginnerluni.
- Ersarilluinnarpoq apersorneqarnissani taanna pillugu eqqartuussissuserisuminik sorpassuit eqqarsaatersuutigisimagai. Isiinnavilluni apeqqutai akioranngilai.
- Apersorneqarnermut tassunga immaqa Oprah-mit piareersarsimaneruvoq. Tamatigut naluneq ajorpaa qanoq annertutigisunik oqarsinnaanerluni, eqqartuussinertaqassanngippat taarsiivigineqarnissamillu piumasaqartoqassanngippat. Piareersarluarsimasorujussuuvoq, Lars Werge oqarpoq.
Alla maluginiagassaq tassaavoq Lance Armstrongip nunani tamalaani sikkilertartut kattuffiat (UCI) saassutinngimmagu, taanna oqarpoq.
- Pisimasumi matumani UCI qoqassinngilaa. Taamaappasinngilaq. Isumaqarsimagaluarpunga annertunerusumik nakkaaqatissarsiussasoq, Lars Werge oqarpoq.
-UCI-mi præsidenti præsidentiusimasorlu tatineqartutut misigisimasimassaqaat. Armstrongillu apersorneqarnerata immikkoortuani siullermi taaneqanngillat (immikkoortup aappaa arfininngormat unnuakkut pissaaq, aaqqiss.).
Tyler Hamilton, Armstrongip holdeqatigisimasaa, Oprah-mit apersorneqalinnginnerani oqarpo UCI-mi qullersat annilaangassutissaqartut.
Armstrongimmi eqqortut tamaasa oqaluttuarippagit UCI aamma eqqorneqassaaq, Hamilton oqarpoq, taassumalu siorna misigisalikkersaarutini "The Secret Race" saqqummersippaa, tassani ilaatigut Armstrongip nukkassaatinik atornerluisimanera oqaluttuaralugu.
- Inuit timersuummik aqutsisut akulerussimasut ajornersaapput. Sulilu ulumi timersuut aquppaat. Ingasattorujussuuvoq.
- UCI isertuussiniarsimavoq. "Golden boy"-tut ittumik peqarput. Taanna UCI-p aningaasarpassuarnut aqqutigaat, Hamilton pingasunngormat 60 MInutes Sports-imut oqarpoq.