Arnat arsaattartut siunissaat pingasunngornermi paasinarsissaaq
Kalaallit arnat arsaattartut pingasunngornermi Ålandimut unammissapput unamminerlu taanna aalajangiissaaq inissinniunnerni sorlerni kalaallit unammeqataassannersut. Unamminermi tassani ajugaasut normu 5-nngorniutissapput ajorsartut normu 7-nngorniutissasut.
Annonse
Kalaallit unamminermi siullermi Rhodosimut 5-0-mik ajugaapput aappassaanillu unamminermi Gotlandimut arsarluaqisumut 0-2-mik ajorsarlutik. Maanna pingasunngornermi ullaakkut Åland unammisussanngorpaat.
– Taakku Gotlandimiutut tunioraatsiginngillat. Ilimagaara tassani naligiingaatsiarumaarluta, taama Sermitsiaq.gl-imut oqarpoq kalaallit sungiusaasuat Bent Petersen.
Aatsaavissuaq kalaallit arnat Island Gamesimi arnani arsaateqataapput unamminerillu siulliit marluk ilinniarfiungaatsiarsimapput.
– Island Gamesimi tallimariarluni taarsiisoqarsinnaavoq periarfissarlu taanna atorniarsimavara sapinngisamik amerlasuut arsartinniarlugit misilittagartusarlugit, taama Bent Petersen oqarpoq.