Arsaannermi GM
Arsaannermi GM: Kugsak-45 T-41-mut ajugaavoq
Arsaannermi GM-mut Qeqertarsuarmi mellemrundemi unamminerit ingerlaqqipput. Angusat takukkit
Kugsak-45 Qasigiannguaneersoq arsaannermi GM-mut anngunniunnermi mellemrundemi Qeqertarsuarmi pisumi siullermeerluni unammivoq. Kugsak-45 T-41-mut Aasianneersumut 2-1-mik ajugaavoq Nagdlúnguarlu Ilulissaneersoq ajugaarujussuaqqippoq.
Kugsak-45 tallimanngornermi ualikkut ilungersungaatsiartussaavoq. Tassami siorna sølvinnattut G-44 Qeqertarsuarmeersut unammissavaat taakkulu nammineq arsaaffimminni anngunniunnermi aallartilluarput.
- Kinguaariit nikinnerat ingerlapparput inuusoqisunillu ukiormanna arsaattoqarluta. Arsaattuvut arlallit aatsaat siullerpaamik inersimasuni unammeqataapput. Taamaattoq isumaqarpunga G-44 aamma Nagdlúnguak unammillerluarsinnaagivut. Unamminerilli qanoq naammassiumaarnissaat pillugu oqaaseqarnissamut siusippallaarpoq, Kugsak-45-mi sungiusaasoq Nikolaj Samuelsen Sermitsiaq.AG-mut oqarpoq.
Nagdlúnguak sisamanngornermi ajugaarujussuaqqippoq I-69 Ilulissaneersoq 9-0-mik ajugaaffigalugu. Marlulissat Lars-Erik Reimer aamma Nick Reimer arsarluarput. Nick Reimer sisamariarluni isertitsivoq Lars-Erik Reimer marloriarluni isertitsisoq. Isertitsisut allat tassaapput Kaali Lund Mathæussen, Markus Jensen aamma Niels Møller Thorleifsen.
Unamminerit tallimanngornermi ingerlaqqissapput tassani G-44 aamma Kugsak-45 unammissallutik unamminerullu aappaani T-41 Aasianneersoq aamma I-69 Ilulissaneersoq unammissapput Nagdlúnguak arsanngikkallassasoq.