Arsaattartut peqatigiiffiannik pilersitsisoqalerpoq
Kalaallit Nunaanni arsaattartut peqatigiiffiat oqalliffiussaaq, silami arsaannermik futsalimilu ineriartortoqaqqinnissaa oqallisigineqartassalluni.
Arsaannermik unammisartut peqatigiiffeqalernissaat ukioq kingulleq eqqartorneqalerpoq.
Unammisartut pitsaanerusumik atugassaqartinneqarnissaat pillugit peqatigiiffimmi oqallittoqartassasoq Patrick Frederiksenip oqaatigaa.
- Peqatigiiffik pilersikkiartuaarneqarpoq, isumagisassat kingulliit maannakkut suliarineqaleruttorput. Kalaallit Nunaannut tulluartunik maleruagassaqarnissaa maannakkut sulissutigineqarpoq, Sermitsiaq.AG-mut oqarpoq.
Unammersuaariaatsip allanngortinneqarnissaa
Unammisartut aalajangiinernut sunniuteqarnerunissaat peqatigiiffiup siunnertarissavaa.
- Assersuutigalugu futsalimi ukiumut ataasiarluni sapaatip akunneranut ataasiaannarluni pissartanngorniuuttoqartarnera unammisartunit naammagineqarpallaanngilaq. Maanna ineriartortitsisoqaqqittariaqalerpoq, unammersuaarnerillu agguataarneqartariaqalerput, tikkuaavoq.
Takorloorneqarpoq timersoqatigiiffiit anngunniuteqqaartassasut ’main round’-imik taallugu. Anngunniunnermi ingerlaqqittut unammersuaariartarnissaat takorloorneqarpoq, taanna ‘Final 6’-imik taaneqartassasoq siunnerfigineqarluni.
- Taamatut aaqqissuunneqartalertuuppat timersoqatigiiffiit ukioq kaajallallugu sungiusarsinnaasalissapput. Unammersuaarnerillu naammassigaangata nunanut allanut unammisartut sungiusarluarsimallutik nunanut allanut unammiartortalissagaluarput. Maannakkut unammersuariaaserput malillugu timersoqatigiiffeqarpoq aatsaat juullereeraangat sungiusartalertartunik. Apriilimi ’main round’ ingerlanneqartalissasoq takorloorparput, ’Final 6’-ilu oktobarimi ingerlanneqartarsinnaasoq neriuutigalugu, Patrick Frederiksen oqarpoq.
Sukkanerpaaq atorlugu pilersinneqarniarpoq
Peqatigiiffik juullertinnagu pilersinneqarsimanissaa neriuutigaa.
- Silami arsaattarnerup futsalertarnerullu siuarsarneqarnissaat unammisartut peqatigiiffimmi eqqartorneqartassapput. Taamaasilluni unammisartut isumaat kattuffimmit aamma tusaaneqartalissagaluarput. Futsalimi kingullermik GM-ertoqarnerani peqatigiiffiliortoqarnissaanik pilersaarut timersoqatigiiffinnut allanut saqqummiupparput, unammisartuniillu tigulluarneqarpoq, Patrick Frederiksen oqarpoq.
Angutit unammisartut peqatigiiffimmi ilaasortanngorsinnaasut siunnerfioqqaarpoq, kingusinnerulaartukkullu arnat aamma peqatigiiffimmi ilaasortaasinnaanngornissaat siunnerfiulluni.