Arsartartut nuannannissaraluat naak
Imaanngilaq arsartartut Flensburg-Handewittimut unamminerlukkamik GOG'illi aningaasarliornera unamminermiit malunnarneruvoq.
Assammik arsartut unamminerat nuannersorsuussagaluarpoq Flensburg-Handewitt danskinik arsartartunik ilaatigut makkunannga Lasse Boesen, Lasse Svan Hansen, Anders Eggert, Michael V. Knudsen, Thomas Mogensen Lars Christiansenillu inuttaqarluni marlunngornermi unnukkut GOG Jakob Larsenimit Minik Dahl Høeghmillu peqataaffigineqartut Gudmep timersortarfiini 800-nik isiginnaartoqarluni unammimmata.
Assammik arsartut isiginnaartullu nuannisarnissaraluat qatangiinnarpoq. Arsartartut arsarluaraluartut GOG'ip aningaasarliornera oqallisigisanit pingaarnerpaammat.
Assammik arsarneq pillugu oqaaseqartartut nuimasut arlallit sermitsiaq.gl-ip oqaloqatigisaasa annilaanngatigaat Fynip kujataani pikkorinnerit assammik arsartarnerat oqaluttuaannanngulersoq.
Akiliisinnaajunnaarneq uaneralaamiippoq. Aningaasaliisarnikut arlallit oqaluttuarput nunarsuaq tamaat aningaasarliorneq pissutigalugu aningaasaliinissaminnut periarfissaqaratik taamaammallu sponseritut ingerlaqqinnissaminnut sivitsuisinnaanatik. GOG'ip qullersai takussaanngillat. Aningaasaqarnertik qanoq iliuuseqarfiginiarlugu isumaqatigiinniarlutik ataatsimiipput.
Arsartartut juulimi aningaasarsiassatik suli tigunngilaat.
Assammik arsartut arsarnerat ajorpallaanngilaq. Aallartinnerloriarlutik GOG'ip illersuilluarneratigut soorlu pisarnertut Jakob Larsenip nukissani tamaasa atorlugit unammineratigut arsarneq pitsanngoriartorpoq nikinnermilu Flensburg Handewitt 16 - 10-mik siuaqqavoq.
Unamminerup immikkoortuata aappaani Flensburg Handewitt sukalaneruvoq dommerillu marluk arsarneq naammassillugu siggarmata tyskit 33 - 22-mik ajugaapput.
Jakob Larsen unammineq tamangajaat arsaqataavoq Minik Dahl Høeghili minutsini ikittuinnarni peqataavoq, Jakob Larsen marloriarluni minutsit marluk anisitaavoq Michael Knudsen danskinit nunanut allanut unammisartoq sakkortuuliorfigigamiuk.
GOG pissartanngorniulluni unammeqqaassaaq septembarip qulingiluaanni tamannalu pitinnagu aningaasaqarneq aaqqeqqaartariaqarpoq taamaattoqanngippammi GOG pissartanngorniuunnerni peqataasinnaanngilaq.