Assammik arsarneq: GM-imi unamminerit pissanganartut
Assammik arsarnermi Nunatsinni pissartanngorniunnerit marlunngorpat aallartissapput. Ukiorpassuarni arnani angutinilu pissartaasut GSS unammillerneqarluarsinnaasut assammik arsarnermik ilisimasalik naliliivoq.
Nunatsinni assammik arsarnermi pissartanngorniunneq Nuummi Inussivimmi ingerlanneqassaaq, unammersuaarneq aqagu marlunngornermi aallartissalluni.
Ukiuni unammiuaarfiusuni GSS 2010-mit arnani angutinilu pissartaanikuupput. Timersoqatigiiffiilli allat ukioq manna pissartanngornissamut periarfissaqarsinnaasut Kim O. Petersen naliliivoq. Taanna GSS-ip arnartaani sungiusaasuunikuuvoq, maanna arnat nunanut unammisartui Nuummi qaammammut ataasiarlutik sungiusaqatigiikkaangata sungiusaasuusarluni.
Unammersuaarneq pissanganarsinnaasoq
- Angutini unammersuaarneq pissanganarsinnaavoq. Angutit nunanut allanut unammisartut VM-imut aasaru anngunniuttussaapput, tassani peqataarusuttut sungiusarluarnikuullutik. GSS nukittorpasipput, timersoqatigiiffiit allalli aamma nukittorpasillutik. Ukiuni kingullerni unamminerit naligiiffiunerulernikuupput, timersoqatigiiffiillu allat qanoq inissisimanersut takussallugit pissanganarluni, Kim O. Petersen oqarpoq.
Arnani GSS aamma NÛK naligiiffiusumik unamminissaat naatsorsuutigaa.
- Illoqarfimmi unammisaqattaarnermi siullermi NÛK unamminerminni siullermi ajugaapput. NÛK inuusuttunik pissanganartunik unammisartoqarpoq, maanna GSS-imut unammillerluarsinnaalernikuullutik. Maannali GSS-imi unammisartut aamma pisarnermisut pitsaassusertik ateqqikkiartorpaat. Qaqortumit K-33 peqataaqqinnerat nuannerpoq, siunissamilu qaninnermi angutitaat aamma peqataassasut neriuutigalugu, oqarpoq.
Inerisaaneq
- GSS-ip arnartaasa angutitaasalu suut nukittuffiginerpaavaat, 2010-miillimi pissartaasarput?
- 2010 sioqqulluguli siulersuisut inerisaanissaq pingaartitarinikuuaat. Qanoq ingerlariuseqartoqassanersoq pilersaaruteqartuaannarpoq, inerisaanissaq pingaartinneqartarluni. Sungiusaasut siulersuisullu qanimut suleqatigiipput, tamannalu peqqutaalluni timersoqatigiiffik angusarissaarluarniluulluni, Kim O. Petersen akivoq.
Timersoqatigiiffiit allat qanoq GSS-imut qanillattornissaanut apeqqummi ima akissuteqarpoq:
- Illoqarfinni assigiinngitsuni atugassarititaasut assigiinngitsorujussuupput, illoqarfinnimi allani unamminerit amigaatigineqartarput. Illoqarfinnili allani unamminissat periarfissaapput, assersuutigalugu arnat angutinut inuusuttuaqqanut unammisarsinnaallutik. Unamminerit amigaatigineqartarput, taamaattoq aamma ukioq kaajallallugu sungiusaqatigiinnissamut kaammattoqatigiittoqartariaqarpoq. Taakku saniatigut sungiusaasut tunniusimasariaqarput, ataavartumik sungiusartitsisoqartariaqarpoq pilersaaruteqartariaqarporlu ineriartornissaq eqqarsaatigalugu.
Unammisartut pingaaruteqarsinnaasut
Unammersuaarneq aatsaat taama pissanganartigisinnaasoq oqarpoq.
- Angutini Maniitsumit Aqigssiak' timersoqatigiiffinnut akiuulluartorujussuupput unammisaminnut ukioq kingulleq. Maniitsormiut ineriartorluarnerat malunnarpoq. Ilulissanit Nagdlunguak aamma unammersuaarnerni takutitsilluartuaannarput, tunniutiinnanngisaannarlutik, Kim O. Petersen oqarpoq.
Unammisartut maluginiarneqarluarsinnaasut uku tikkuarpai:
Angutit:
- Qatanngutigiit Angutimmarik aamma Akutaaneq Kreutzmann Maniitsumit, GSS-imit qatanngutigiit Miki aamma Nuka Heilmann kiisalu Aqqalu Sørensen. Malik Frederiksen unammisartunngoqqinnikuuvoq, takutitsilluaqattaarnikuulluni. Nunanut allanut unammisartut tamarmik piareersarluarsimarpasipput.
Arnat:
- Inuusuttuaqqat qanoq takutitsissanersut pissanganarpoq. NÛK-mi unammisartut inuusuttut arlaqarput takutitsilluarsinnaasut. GSS aamma nutaartaqarput, taakku saniatigut misilittagartuut soorlu Najaaja A. Lyberth peqataassapput. Holdfællesskabet-ini unammisartut inuusuttut Sisimiuneersut takunissaat pissanganarpoq.
Timersoqatigiiffiit peqataasut unamminissallu uani takuneqarsinnaapput: