Assammik arsartartut kattuffianni avissaartuunneq

Kalaallit Nunaanni assammik arsartartut kattuffiata siulersuisuisa iluanni eqqissiviilliorneq kattuffiup siulittaasuannik siulersuisunilu ilaasortat pingasut tunuarnerannik nassataqarpoq.

- Uggorigaluaqalugu tunuaannarnissara toqqarpara. Ukiuni kingullerni arlaqaqisuni GHF annertuumik piffissaajarfigaara, siulersuisuni nukittuuni sulinissaq qilanaarisimagaluarpara kisianni siulersuisut iluanni assortuuttuarnerit ingerlaqqiinnissaq periarfissaarutippaat, Elise Bruun oqarpoq taanna sinniisut ataatsimiitinneqarneranni apriilimi siulittaasunngorpoq.

Taanna tunuartunit kisiartaanngilaq. Siulersuisunut ilaasortat Gujo Thorsteinsson, Lena Ravn Davidsen aamma Laila Skytte tamarmik nalunaarput GHF-imi suleqataanertik ingerlatiinnarsinnaanagu.

- TImersoqatigiiffimmut angisuumut siulittaasuuvunga ajortussarsiuinnavissunut nukissaqartutut misigisimanngilanga. Qaqortumi, Narsami, Ilulissani aamma Aasianni håndboldskolet, kiisalu Qaqortumi Ilulissanilu sungiusaasunik pikkorissartitsinissamik suliassat allanut ingerlateqqippakka, Lena Ravn Davidsen oqarpoq, taanna Ilulissani Nagdlúnguak siulittaasuuffigaa.

Siulersuisut sinneri suli issiasut tassaapput Kristian Heilmann, Hans Lyberth aamma Lars Erik Gabrielsen.