Asserpassuit: Polar Seafood Super Cupip iluatsilluarnera aaqqissuisut nuannaarutigaat
Sapaatip-akunnerata naanerani Nuummi futsalimi unammiuaarnermit assit takukkit. Aaqqissuisup sungiusaasullu Ole Rasmussenip B67-imeersup unammiuaarnerit iluatsilluarsimammata nuannaarutigaa.
Sapaatip-akunnerata naanerani kingullermi Nuummi meeqqat aqqanillit ataallugit ukiullit illup iluani arsaannermi unammiuaarnerat annerpaaq ingerlanneqarpoq.
B67 Polar Seafood Super Cup 2024-mik aaqqissuisuuvoq, tassanilu holdit nunamit tamarmeersut peqataapput. Meeqqat 192-nit ikinnerunngitsut sungiusaasullu 48-t unammersuarnermut peqataapput.
Aaqqissuisup aamma B67-imi U11-nut sungiusaasup Ole Rasmussenip aaqqissuussineq iluatsilluartoq, nammineq aqutsisoqatigiillu qaammatini arlalinni piareersarsimasaat, nuannaarutigaa:
- Artornarsimaqaaq, kisiannili ilungersornivut tamarmik akilerput, timersoqatigiiffinnit peqataasunit ajunngitsumik akissutigineqartut amerlammata. Uagutsinnut kajumissaataaqaaq, Ole Rasmussen Sermitsiaq.AG-mut oqarpoq
Angerlarsimaffimminni ajugaasut
Aamma angajoqqaat, aatakkuusut allallu unammiuaarnermut atatillugu kajumissutsiminnik ikiuuttut qutsavigingaarpai.
Aamma Ole Rasmussenip B67 hold 2-p ajugaasimanera nuannaarutigisinnaavaa.
- Meeraagaluarlutik aamma ajugaaniarlutik unammisarput, tamannalu nuannerpoq. Hold 2-rtavut ajugaapput. Taakku ukioqatigiinni nukarlertut taasarpavut, taamaattumik ajugaanerat tupaallaatigaarput, Ole Rasmussen oqaluttuarpoq nangillunilu:
- Aalajangersimasumik anguniagaqanngilagut, meeqqat unammiuaarluarnissaat pingaarnerpaajuvoq. Nuannaarneq, timersorneq ikinngutigiinnerlu pingaartinnerpaavavut, oqarpoq.
Timersortartut pikkorissut nuannaarutaasut
Aamma Ole Rasmussenip timersornerup qaffasissusaa tupaallaatigaa:
- Meeqqat teknikkikkut piginnaaneri tupaallaatigeqaara. Tamanna nuannaarutigaarput, futsal-ilu siunissagissaarsorivarput, Ole Rasmussen oqarpoq.
Futsalertartut nunamit tamarmeersut unammiuaarnermut atatillugu Nuummut tikipput, Ole Rasmussenilu oqaluttuarpoq Nuummi naluttarfik meeqqat tikittut ornigarluartaraat:
- Iligiit ilaat angalanissaat ullumikkumut kinguartinneqarpoq. Aqutsisut nuannarivallaanngilaat, meeqqalli nuannaarput – naluttarfimmeeqqissinnaagamik, Ole Rasmussen oqarpoq.
Aappaagu unammiuaartoqaqqinnissaa pilersaarutaavoq. Tusagassaqartitsiviup assiliisuanit sapaatiummat ajugaaniutivinnerni peqataasumit assilisat qulaani takuneqarsinnaapput.
Inernerit:
- 1-inngortut: B67 hold 2
- 2-nngortut: SAK
- 3-nngortut: Kâgssagssuk
- 4-nngortut: B67 hold 1
- 5-minngortut: UB-68
- 6-inngortut: IT-79
- 7-inngortut: B67 3
- 8-nngortut: T41
- 9-nngortut: N-48
- 10-nngortut: N-85
- 11-nngortut: S-68 1
- 12-inngortut: Siuteroq 43
- 13-inngortut: NÛK
- 14-inngortut: GSS
- 15-inngortut: K-33
- 16-inngortut: S-68 2