Assiisivik: NÛK iluatsitsilluarneruvoq
Arnat assammik arsarlutik Nuummi Faxe Kondi Cupimik ullut pingajussaannik unammiuaarneranni GSS finalimut annguppoq
Ukioq manna arnat assammik arsarlutik unammiuaarnerat Faxe Kondi Cup ingerlanneqarnerani sisamanngornermi unnukkut NÛK aamma SAK akornanni unammineq maannamut pissanganarnerpaatut taaneqarsinnaavoq. Holdit marluk unamminerup immikkoortuani siullermi malersuutiinnavipput tulleriiaarlutik isertitsisarlutik. Nikinnermi NÛK målimik ataatsimik siuaqqavoq 10-9.
Unamminerup immikkoortuata aappaani naligiinneq taamaaginnarpoq. Unammineq isiginnaartunut soorlu piukkussagaq Inussivimmilu isiginnaariat nuannisaqaat. Unamminerup naammassiartornera pissanganarpoq ingasaginarsinnaalluni, SAK straffimik isertitaa atorunnaarsinneqarluni NÛK måliniittua piareersimanngimmat taamaattumillu aatsaalloortariaqarluni. SAK-mit arsartoq måleriaqqikkami isertitsinngitsoorluni. Unamminerup naammassiartornerani NÛK pitsaaneruvoq 22-19-imik ajugaalluni.
Misilittagartooq Karen Marie Kyed Meyer assut arsarluarpoq NÛK-miunit isertitsinerpaajulluni arfineq-marlunnik isertitsivoq. Sascha Kilime tallimanik isertitsivoq. SAK-mi Linda Lyberth aamma Ajaaja Bech Jørgensen isertitsinerpaajupput tamarmik sisamaraaramik.
IF Lyseng tupaallatsitsivoq
GSS finalimut anngussinnaavoq IF Lyseng ajugaaffigiguniuk, taakkua Faxe Kondi Cupip ingerlanerani arsarnerminnik ajornartorsiuteqarput. IF Lysengip GSS-imut unamminermini immikkoortumi siullermi ajunngivissumik ingerlapput, immikkoortup siulliup ingerlanera tamakkingajallugu siuaqqallutik. Aatsaat immikkoortup siulliup minutsiisa naggataani GSS-ip siuarnissani iluatsippaa - nikinnermi 11-10.
Unamminerup immikkoortuata aappaani GSS soorlu eqaluk. IF Lysengip nunatsinni pissartat malinnaaffigisinnaajunnaarpaat unamminerlumi naammat GSS ajugaarujussuarput 31-15. Taamaalilluni GSS sapaatiuppat Faxe Kondi Cupimi finalernissaat qularnarunnaarput qanorluunniit NÛK-mut arfininngornermi unamminissaq inerneqassagaluarpat.
Camilla Rosenlund, IF Lyseng tallimariarluni isertitsivoq, Camilla Møller sisamariarluni isertitsisoq. Panu P. Grønvold GSS’ni amerlanerpaanik isertitsivoq arfineq-pingasoraarami, Lykke Frank Hansen arfinilinnik isertitsisoq.
Inissinnerit:
GSS: 3 unamminerit 97-45 6point
NÛK: 2 unamminerit 58-33 4 point
N-48: 2 unamminerit 36-53 2 point
SAK: 2 unamminerit 35-52 0 point
IF Lyseng: 3 unamminerit 46-91 0 point
Sisamanngornermi unnukkut unammisut
Nal. 19.00: SAK – IF Lyseng
Nal. 20.40: Nagdlúnguak – NÛK