Assit takukkit: Arctic Sportsimi piginnaanilik Ukiumi Timersullammanngortoq
Arctic Sportsimi one foot high kickimi aasaq rekordiliisoq, Randi Sigurdsen Zeeb, GIF-imi Maligassiuisut Showimi Ukiumi Timersullammattut toqqarneqarpoq.
Kalaallit Nunaanni Timersortartut Kattuffiata, GIF-ip timersornermi ukioq manna angusarissaartut arfininngornermi 21. oktober Maligassiuisut Showimi nersornaaserpai.
Arctic Sportsimi timersortartoq, Ikerasammiu, Randi Sigurdsen Zeeb Ukiumi Timersullammattut toqqarneqarpoq.
Randi Sigurdsen Zeeb ukioq manna 13-inik ukioqarluni rekordiliivoq, one foot high kickimi qutsinnerpaamik pissilluni tukersingami. Arsaaraq 2 miiterit 14 centimiiteritullu portutingisumiittut tukerpaa, niumilu illuanik natermut tulluni iluatsillugu.
Tamanna pivoq Nuummi Arctic Sportsimi unammiuaartoqarmat.
Nersornaatisinerit allat
Timersortartut pillugit unnussiuaartitsineq Nuummi Katuami ingerlanneqarmat aliikkusersuinertaqarpoq.
Nersornaatit arfineq-pingasut ukioq manna agguaanneqarput.
GIF-imit nersornaatit
- Ukiumi timersullammak: Randi Sigurdsen Zeeb, Arctic Sports, Ikerasak
- Ukiumi aqutsisuullammak: Kenneth Kleist, B-67, Nuuk
- Ukiumi sungiusaallammak: Arnatsiaq aamma Majaq Heilmann, SSP, Sisimiut
Paarisamit nersornaatit
- Ukiumut ataatsimoorfimmi eqeersimaartitsisut: 3.b, Minngortuunnguup Atuarfia, Sisimiut
- Immikkut ittumik nersornaat: Charlotte og Vilhelm Rasmussen, Qaqortoq
Elite Sport Greenlandimit nersornaatit
- Piukkunnaatilinnik ineriartortitsilluarnerpaaq: Loké Svane aamma Kali Mathiassen, B-67 U13-imi sungiusaasut
- Timersornermi takutitsilluarnerpaaq: Ukaleq Slettemark, ujakkaarluni ooqattaasartoq
Tamarmik nersornaasiutaat – Aalasamik nersornaasiineq
GIF, Elite Sport Greenland aamma Paarisa ukioq manna aammaarlutik ataatsimoorussamik nersornaasiipput.
Aalasamik nersornaasiinermi nersornaaserneqarput GIF-ip anguniagaanut, tassa 2030-mi Nunarsuarmi timimik aalatitsinerpaanissamut anguniakkamut sunniuteqaqataasut.
Aalasamik nersornaasiineq
- Aasianni Maajimi Peqqissuusa