Assit takukkit: Inuusuttut timersornermi piginnaanillit Nuummi katersuutsinneqartut
Inuusuttut timersornermi piginnaanillit Nuummi aappassaat Elite Sport Greenlandimit katersuutsinneqarput. Piginnaanillit katersuutsinneqarnerat ulluni sisamani sivisussuseqarpoq, inuusuttullu ineriartornissaannut sakkussanik pissarsiffiulluni.
Inuusuttut timersortartut 15-t 20-t ataallugit ukiullit tallimanngorneq 17. novemberimiit 20. november ilanngullugu Elite Sport Greenlandimit Nuummi katersuutsinneqarput.
Inuusuttut nunatsinni timersuutinik assigiinngitsunik sungiusartarput, timersornermilu piginnaaneqarluartutut nalilerneqarlutik.
Ulluni sisamani katersuutsinneqarnerminni imminut sungiusaasorisinnaanermut sakkussanik, timikkut tarnikkullu nukittorsarsinnaanermut timersortartuunermilu peqqinnartumik inooriaaseqarnissaq pillugu ilinniartinneqarput.
- Inuusuttut piukkunnaatillit angerlarunik sakkussat nammineq, kiisalu unammisartoqatiminnut atorneqarsinnaanerat periarfissaalluarpoq, Elite Sport Greenland Facebookimini allappoq.
Elite Sport Greenland ilisimatitsivoq timersortartut arlallit Nuummeersuusut, aammali sinerissamit katersuutsitsinermut peqataajartortunik tikittoqartoq. Sungiusaasut innersuussinerat malillugu katersuutsinneqartut toqqarneqarsimapput.
Atuartut timersortullu
Peqqinnartumik inooriaaseqarneq tarnikkullu nukittunissaq kisimik atuartitsissutigineqanngillat, inuusuttut peqataasut aamma timersoqatigiitsinneqarput sammisaqartinneqarlutillu, soorlu allaaserisap qulaani assini takusinnaagitit.
- Akisussaaffimmik tigusisinnaanerat anguniangaajuarpoq pitsaasunik ineriartuutaasunik avatangiiseqarneq pingaarneruleraluttuinnartillugu, Elite Sport Greenland allappoq.
Grønlandsbanken aamma Tusass inuusuttut piginnaanillit ineriartornissaannut aningaasaliisutut tapersersuisuusut ESG ilisimatitsivoq.