"Avannaata Qimussersua" Nunavumit tikeraanit malinnaaffigineqassaaq
Nunatsinni qimussertortartut kattuffianni KNQK-p siulittaasoq, Mikkel Jeremiassen iluarisimaarinnippoq ukioq manna qimussimik unammersuarnissamut Avannaata Qimussersuanut piareersarneq maanna naammassilluinnalermat. Unammersuarnissap qaavatigut unammersuartussat Nunavumiit naggueqatitsinnit tikeraarneqassapput. Nunavummimi qimmeq qimuttoq uterteqqinniarneqarpoq, uagullu ikiorusuppagut, Jeremiassen oqaluttuarpoq.
Ukioq manna Avannaata Qimussersuata ingerlanneqarnissaani Nunavumit tikeraat arfineq pingasut unammersuarnermi najuuttussaapput.
- Taakku uagutsinnit isumassarsiorusupput aammalu ilinniarfigerusuppaatigut qimmit qimuttut qanoq paaqqutarineqartarnersut atorneqartarnersullu, uagullu ikiorusuppagut, taamaammat tikeraarnissaat qilanaarivarput, KNQK-p siulittaasua Mikkel Jeremiassen oqaluttuarpoq.
Kalaallit qimmiat qimuttoq oqaluttuarisaaneq kingumut qiviassagaanni issittumi tamarmi uumasuutaanikuuvoq, ilisimatuullu naapertorlugit issittumi qimmeq qimuttoq, issittumi nunat nunallu inoqarfii isorartugaluaqisut qimmip qimuttup sananeqaatimigut assigiissusia innarlerneqanngingajalluinnarnikuuvoq.
Taamaattorli Canadami qimmeq qimuttoq nungusarneqarnikuuvoq, illuatungaanilu Kalaallit Nunatsinni ukiorpassuit ingerlanerini illersorlugulu iluatsittumik nungutsaaliugaanikuuvoq, maannalu kalaallit kulturianni eriagisaallunilu erligisaanera suli atuulluni. Piniariarnermut atugassaannaanngitsutut, maannali aamma ukiuni qulikkaani arlalissuarni ukiut tamaasa malinnaaffiginnikkusuttorpassuarnik qilanaarineqartartumi qimussimik sukkaniunnersuarni qitiulluni.
Ukiorlu manna qimussimik sukkaniunnissarsuaq aamma ilanngullugu.
Air Greenland-ip angallassinissaa inississimalereerpoq
Mikkel Jeremiassen oqaluttuarpoq, Air Greenland kingumut ukioq manna angallassinissaminut piareersareersoq, taamaalillutik unammersuaqataasussat Ilulissiartussat, Avannaata Qimussersuanik ingerlatsiviusussaammat, apuussorneqarnissaat angerlaateqqinneqarnissaallu isumannaarneqarsimalereertoq. Nunatta Kangianit peqataasussat, Avanersuarmit peqataasussat aammalu qimuttunik qimmeqarfiit kujallersaanit peqataasussat taamaalillutik timmisartuunneqarnissaat isumannaarneqarsimalereerluni:
- Peqataasussanut ullut angallavissat tamarmik inissinneqareerput, taamaalilluni unammersuarnermut peqataasussat nunap immikkoortuini aggerfiinit apuunnissaat angerlaqqinnissaallu qulakkeerneqarpoq. Qeqertarsuup tunuamiut unammersuarnermi peqataasussat imaatigut angallatinik apuussorneqarlutillu angerlaateqqinneqarumaarput, taamaammat Ilulissanut apuussortoqassaaq ulluni 9. martsimiit 11. marts ilanngullugu.
- Arfininngorneq 9. marts Upernavimmiit tikissapput nal. 13:45 GL 893
- Arfininngorneq 9. marts Sisimiuniit tikissapput nal. 17:15 GL 893
- Sapaat 10.marts Qaanaamiit tikissapput nal. 14:05 GL 893
- Sapaat 10.marts Qaarsuniit tikissapput nal. 17:05 GL 893
- Ataasinngorneq 11. marts Nerlerit Inaanniit tikissapput nal. 13:20 GL 893
- Ataasinngorneq 11. marts Kulusummiit tikissapput nal: 18:30 GL 893
- Ataasinngorneq 11. marts Nunavumiit tikeraartussat tikissapput
- Sisamanngorneq 14. marts: Meeqqat Qimussersuaararnissaat aallartissaaq nal. 13:00
- Arfininngorneq 16. marts: Inersimasut unammersuarnissaat aallartinneqassaaq nal. 12:00
Piareersarnerit Avannaatalu Qimussersuata ingerlanneqarnissaani pisussat tamaasa ugguuna malinnaaffigineqarsinnaapput: