AWG 2024: Inuusuttut kulturilerisutut sinniisussat pissarsiariniarneqarput
Arctic Winter Games 2024 martsimi Alaskami ingerlanneqassaaq. Kalaallit Nunaat nunallu peqataasut allat tamarmik inuusuttunik kulturikkut pikialaartitsisussanik sinniisoqartussaapput. Inuusuttuuit 14-19 akornanni ukiulik, taava suliassamut toqqakkatut inissinniarsinnaavutit.
Inuusuttut Tasiilameersut ornigullutik piukkunnarnerminnik nittarsaassereerput, tassani inuusuttut Tasiilarmiut 21-init ikinnerunngitsut inuusuttut kulturikkut illuanni peqataapput. Tassunga pissutaavoq siumoortumik aalajangerneqareermat Nunatta Kangianit inuusuttut marluk kulturikkut pikialaartitseqataasussatut toqqarneqassasut, taamaammat inuusuttunit misilitsittunit 21-iusunit marluk peqataajumaarput.
Tasiilami piginnaasanik takutitsinermut misilitsinneq inuusuttut kulturikkut illuanni ingerlanneqarpoq Eino Taunajik suleqatigalugu, taanna nuannaarpoq inuusuttut taamak amerlatigisut Tasiilami misilitsissimammata:
- Inuusuttut taamak amerlatigalutik misilitsimmata assut pikkorinaarpakka. Tassami sapiissuseqartariaqarpoq imminullu upperisariaqarluni. Naak marluinnaat toqqarneqartussaagaluartut, taamaattoq misilitsittut taamak amerlatigisut peqataanerisigut ersersinneqarpoq piginnaasallit amerlasoorujussuusut, Eino Taunajik, ulluinnarni inuusuttunik sullissisuusoq oqarpoq.
10. oktober tikillugu inuusuttut videoliaminnik nassiussisinnaapput
Maannali tassa inuusuttut 14-19-nik ukiullit qarasaasiatigut imminnut piukkuttut misilitsissinnaanngorput. Inuusuttut peqataarusuttut videoliaminnik NAPA-mut nassiussisinnaapput, taamak ilisimatitsivoq nunat avannarliit Kalaallit Nunaanni instituttiat, NAPA, kulturikkut sammisassanut nunatsinneersunut ataqatigiissaarisuusoq.
Inuusuttut kikkulluunniit 14-it 19-llu akornanni ukiullit periarfissaqarput Alaskami Arctic Winter Games-imi peqataanissaminnut periarfissaqarput, toqqakkat Alaskameereernermi Nuummut, Islandimut aammalu Savalimmiunut aamma ingerlaqqittussaapput.
NAPA ilisimatitsivoq, illit toqqagaanissannik anguniagaqassaguit, taava videoliussaatit imminut ilisaritillutit. Videot nassiunneqartut aallaavigalugit inuusuttut toqqarneqarumaarput.
Videomi inuusuttut imminnut ilisaritissapput aammalu sooq toqqagaanissaminnut piukkunnarnerlutik tunngavilersuissapput.