B-67 aamma G-44 pissartanngorniutilerput
Nuuk aamma Qeqertarsuaq angutit nunatsinni arsaallutik pissartanngorniutivittussanngorput. Klubbit marluullutik sapaatip akunnerata naanerani unammisaqattaarnerminni pissartanngorniutivinnissartik qulakkeereersimavaat, maannalu unammisussanngorput.
Nunatsinni pissartanngorniunnerit aallartimmata unamminerit siulliit uteqqittutullusooq illugit, nunatsinni pissartanngorniutivinnermi G-44 aamma B-67 unammisussanngorput. G-44 aamma B-67 unammeqqaarmata illuatungeriit unammilluarsimaqaat, arsaannerlu pissanganarluinnarsimalluni.
Unammineq siulleq 3-2-mik inerneqarpoq, Qeqertarsuarmeersut G-44 ajugaallutik. Klubbit maanna naapeqqittussanngorput. Ullumilu pissartanngorniunnermi 1-inngorniunnermi Qaqortup arsaattarfiani nal. 17.00 arsaatissapput.
Qeqertarsuarmeersut G-44 unammisui inuusukaanerupput, nukarliillu marluk ukioq manna 14-iliisussaallutik. Sungiusaasuat Nukannguaq Zeeb taamaasilluni inuusunnerpaanik arsaattoqarpoq.
- Taama inuusutsigisut unammeqataatinnerisigut takutipparput inuusunnerusut unammersuarnerni aamma peqataalluarsinnaasut. Nunanut allanut unammisartut inerisarusukkutsigit, arsaattartut inuusunnerusut aamma peqataatittariaqarpagut, ilungersorluarsinnaanerallu upperilluinnarlugu, Nukannguaq Zeeb G-44-imi sungiusaasoq oqarpoq.
Unamminerni sisamani ajugaasut
B-67 Nuummeersoq aamma G-44 Qeqertarsuarmeersoq unamminerni tallimaasuni tamarmik sisamariarlutik ajugaapput. B-67 G-44-mut ajorsarsimasoq, G-44 K-33-mut unammingami nalingiissimapput.
B-67-imi sungiusaasup Christian Bohmann Knudsenip unammisartut inuusunnerusut ukioqqortunerillu unammiartippai. Unammiartut assigiinngitsutigut piginnaasaqarluarput.
- Unammineq siulleq naammassimmat (G-44-mut) soorunami pakatsisimaarpugut. Taamaakkaluartoq tunniutiinnanngilagut, unammersuarnermilu unamminerit sinneri ajugaaffigaagut. Ullumi periarfissinneqarpugut akiniaanissamut, unamminerullu inerneri siulliit nalaatsornerinnaasut takusinnaallugit, B-67-imi sungiusaasoq Christian Bohmann Knudsen Sermitsiaq.AG-mut oqarpoq.
Nukannguaq Zeeb oqaluttuarpoq illoqarfimmiit mikinermeerluni, soorlu Qeqertarsuarmeeraanni, unammiartussanik nassaarniarneq ajornakusoorsinnaasartoq. Unammiartuutinili angusarissaarmata tamanna tulluusimaarutigaa.
Pitsaanerit ajugaallik
- Pissartanngorniunnerni ulluni arfinilinni unamminerit arfinillit naammassissallugit timimut assoroornartorujussuuvoq. Takusinnaavara arsaattut sapinngisartik tamaat tunniussaqartut sukataartullu, tamannalu tulluusimaarutigilluinnarpara. Inuusuttut arsaattartut ineriartornissamut periarfissagissaaqaat, tamanna takutipparput, oqarpoq.
Christian Bohmann Knudsen ullumi unamminissamut piareersimavoq, G-44-llu ajorsarteriarnissaanut aamma piareersimalluni. Kuultinnanniunneq ullumi nal. 17.00 aallartissaaq.
- Kalaallit Nunaanni arsaallaqqinnerpaanerput takutissavarput. Unammiarpugut soorunami ajugaarusulluta, oqarpoq.
G-44-mi sungiusaasoq mianersornerulluni oqarpoq piareersarluarnerpaasimasut ullugissaarnerpaasullu ullumi ajugaajumaartut, unammiartuili sapinngisartik tamaat sukataassasut.
Pissartanngorniunnemi 5-inngorniunneq ullumi nal. 13.00 aallartippoq, N-45 Paamiuniit aamma E-54 Tasiusamiit unammillutik. IT-79 Nuummeersut aamma K-33 Qaqortumeersut bronzennanniunnerat nal. 15.00 aallartissaaq.