Barcelona: Isertinneqartoq siulleq pingaaruteqassaqaaq

Fc Barcelona kvartfinalimi unammiffiusumi tullermi Atletico Madridimoornermi semifinalinut anngutissagunik siulliullutik isertitseqqaartariaqartut sungiusaasoq Gerardo Martino oqarpoq.

Camp Noumi unamminermi siullermi unammisut 1-1-imik naligiipput. La Ligami Atletico Madrid siuttuupput 79-inik pointeqarlutik - pointimik ataatsimik Barcelonamit amerlanerullutik.

- Unammigaangatta pingaaruteqartuaannarpoq siuaqqaarnissarput, aatsaallu maannakkut siuaqqaarnissarput taama pingaaruteqartigaaq.

- Siulliulluta isertitseqqaartariaqarpugut, taamatut unammineq aatsaat aqussinnaalissavarput, Gerardo Martino oqarpoq.

Unammineri kingulliit sisamat naligiiffiupput, ligami ataaseq, Super Cupimi unamminerit marluk, marlunngormallu kingullermik unamminerat siulleq.

Unamminerni taakkunani Lionel Messi isertitsinikuunngilaq.

Ukiaq Barcelonami tusaamasaq ajoqquserpoq, maannakkullu arsariaatsini atiartoqqilerlugu.

Taamaakkaluartoq La Ligami 25-raareerpoq.

- Semifinalimut ingerlaqqinnissatsinnut Lionel Messi qitiulluinnassaaq, Gerardo Martino oqarpoq.

Atletico Madridimi tunioraasartoq Arda Turan unamminermi ilaassanngilaq ajoqquseqqanini pissutigalugu.

Arsaqataasussatut Diego Costa ilanngunneqarsimavoq, sulili nalunarpoq unamminermi isissanersoq. Atleticomi sungiusaasup Costap pisinnaasai qularutiginngilai.

- Arsarluataarnikooqaaq, ukiuni kingulliusuni sunniuteqaqataanikooqalunilu. Barcelonamut isertitsinissaa qularutiginngilara, Diego Simeone oqarpoq.

Atletico Madridip angusarissaarneranut Diego Costa sunniuteqataalluarpoq. Ligami Messitulli 25-nik isertitaqarpoq, Champions Leaguemilu arfineq-marloraarnikuulluni.

Pingasunngornermi Bayern München Manchester Unitedilu unammissapput, unammineq siulleq Old Traffordimi naligiipput 1-1-erlutik