Biathon: Ukaleq nunarsuarmi pissartanngorniuteqataareerluni unamminissanut tullernut piareersarpoq
Ukaleq Slettemarkip Biathlonimi nunarsuarmi pissartanngorniunnermi Tjekkiami ingerlanneqartumi nunatta erfalasua nittarsaateqqammerpaa. Unammersuarnermi 7,5 km sprint (77/93) aammalu ataasiakkaarnermi 15 km (65/91) ingerlappai.
Tjekkiami Nove Mestomi nunarsuarmi ooqattaasarluni sisoraatinik oqilaniunnermi pissartanngorniuffiusumi sila assut nalaatsorsimavoq, sialleqattaarluni aputillu ilarujussua aalluni sisorarfigiuminaassimammat. Taamaattorli Ukaleq Slettemark oqaluttuarpoq aaqqissuisut assut tamaviaarsimasut nunarsuarmi pissartanngorniuttut sisorarfii sapinngisamik pitsaanerpaatinniarlugit.
Unamminini siulleq, 9. februar ingerlanneqartoq pillugu Ukaleq Slettemark ima oqaluttuarpoq:
- Unammiffimmi silap pissusaa arpalluarnissamut assut ajornakusoortitsivoq. Aput masappoq, ajoraluartumillu tamatuma malitsigisaanik arpaffik assigiinngisitaartorujussuulluni. Uangalu sisoraatissatut toqqakkakka ajoraluartumik pissutsinut naleqquttuunngillat, taamaalillunga ammukajaakkornerit tamaasa ingerlaarninni sekunterpaaluit annaavakka. Qujanartumilli nalunngilara qajusaassusera suli qaffakkiartortoq. Taamaammat unammineq taanna ataatsimut isigalugu naammagisimaarinnippunga. Teknikkikkut pisinnaasakka iluarsiniagassartaqalaarput, arpaffimmi taamak aqitsigisumi periaatsikka pitsanngorsassavakka, Ukaleq sprintimi unammeqataareerluni oqarpoq.
Ukaleq unamminermi tassani ooqataassagassanit quliusunit qulingiluat eqqorpai, taamaammallu umerluartartutut akuerisaalluinnarluni.
15 km kisimiilluni unamminermi ingerlalluarnerusoq
Marlunngornq 13. februar kisimiilluni 15 km unammissutigineqarpoq.
Tamatumuuna Ukaleq piareersimaneruvoq silap, aputip masattup sialuullu ataani unammersuartut unamminissaannut ajornartorsiortitsineranut. Unammineq aallartitsinnagu periusissani piareersarluarsimavaa, sukkassuseq atugassani aammalu pallungalluni ooqattaasarnissani qanoq ingerlatissanerlugit piareersarluarnikuulluni, unamminermimi tassani tallimariarluni kaajallannermi sisamariarluni ooqattaasartoqartussaammat.
Ooqattaasarneralu ingerlallualaavippoq, tassami eqqoriaanerit 20-iusunit 18-eriarluni eqquivoq, tamatumalu uppernarsarpaa timersuumminut pikkorilluinnartuusoq.
Timersuummi nunaaqqatut unammillugassat
Ukaleq Slettemark ataatsimut isigalugu angusaminik naammaginnivinngilaq. Taamaattorli nunat unammissutaasumi tassani siuarsimasupilussuit unammivai, nunat taakku siuarsimalluartut unammisartui ikiuuttorpaassuaqartarput, aamma sisoraatit sorliit atorneqassanersut minnerunngitsumillu silap qanoq inneranut atatillugu eqqortumik pujassaanissaq pillugu, taamaammat sutigut tamatigut pissutissaqarpoq tulluusimaassalluni ooqattaasarluni sisoraatinik oqilaniunnermi nunarsuarmioqatigiit unammisarnerini peqataasarnini pillugu, nunarpummi timersuummi tassani nunamineerannguuvoq.
Nunarsuarmi pissartanngorniuteqataanini pillugu Ukaleq nammineq ima oqaasertaliivoq:
- Naatsorsuutigisimagaluarpara qasujaassusera pitsaanerulaassasoq, tassami unammersuarnissaq sioqqullugu sungiusarlualaavinnikuugama. Taamaattorli angusakka pillugit pakatsisimaalaaraluarlunga, qasujaassusera pitsanngoraluttuinnarpoq, taamaammat siunissami unammersuaqataasarnissannut piareersimavunga. Anguniagassaq annertooq tulleq tassaavoq aappaagu Schweitzimi nunarsuarmi pissartanngorniuttoqarnerani peqataaqqinnissara.
Sisoraatit taakkulu pujassartarnissaat eqqortut toqqartarnissaannut, Ukaleq ajornartorsiuteqalaarsimavoq suleqatissaminik nassaarniarnissamut, taamaattorli siunissami suleqatissarsiortarnini suli pitsanngorsarpaa unammersuarnerillu sioqqullugit isumaqatigiissuteqareertarnissaq aamma isumagisassaanut pingaarutilinnut ilaavoq.
Naak massa Kalaallit Nunarput timersuutip taassuma iluani nunamineerannguugaluartoq, aamma pingaartumik nunarsuarmi pissartanngorniuttoqartillugu, taamaattoq tapersersorneqarneq misigilluaavissimavaa. Taamaammat Ukaleq Slettemark nuannaarlunilu qujamasuppoq tapersersorneqarluarnini pillugu:
- Unamminitsinni nunatta danskillu erfalasui erfalasorpassuit akornanni takussaasut malugaara. Malugaara malinnaasoqarluartoq aammalu qiimmassarlunga suaartartoqartoq, assullu tulluusimaarlunga tikittarfiup nalaani isiginnaartut arlaleriarlunga aalateriffigivakka, tamannalu assut tuppallernarpoq qujamasunnarlunilu.
Arctic Circle Race 2024-mi peqataassaaq
Ukaleq Slettemark ooqattaasarluni sisoraatinik oqilaniuttarnermi nunarsuarmi nallersuussinnaalluni timersortartuuvoq, naallu ooqattaasarluni sisoraatinik oqilaniunneq aammalu takisuumut ujakkaarluni oqilaniunneq assigiinngilluinnaraluartut, siunissami qaninnermi pisussamut pilersaaruteqarpoq:
- Aatsaavissuaq ACR-imi peqataassaanga, tamannalu sioqqullugu sungiusartarnera allanngortilaartariaqassavara, Ukaleq Slettemark aatsaavissuaq Arctic Circle Racemi peqataasussaq pissangaqaluni Sermitsiaq.AG-mut oqaluttuarpoq.
Arctic Circle Race 2024 Sisimiuni ulluni 22. - 24. martsimi ingerlanneqartussaavoq.