Chilemut ajorsarput
Kalaallit Nunaat Amerikap Nunavittaani Unammiuaarnerni Säo Carlosimi pingasunngornermi aappassaanik unammivoq. Akeraavoq Chile, taanna 31-28-imik ajugaavoq, muminnermi 19-12-imik siuaqqareerluni.
Nunanut allanut unammisartunut sungiusaasoq Jakob Andreasseni unamminerup kingorna oqarpoq, Kalaallit Nunaat Chilep unammisartuinut ullumikkut arsarluarnerusunut ajorsartoq. Kalaallit saassussinermi ippassaq unamminermut sanilliullugu pitsanngoriarsimavoq, kisianni arsarnerup immikkoortuata aappaani arsarluarneq Minik Dahl-Høeghilu arsarluarnerpaajugaluartoq tamanna naammanngilaq.
Arsartartut ajorsarnermik kingorna pakatsisimapput, kisianni arsartartoqatigiit piareersarnissamut periarfissarisimasaat eqqarsaatigalugit piffissap sivitsulaarpat naammaginartutut takuneqarsinnaalissaaq. Kisianni arsartartut nalunngilaat, arsartartutut ataqatigiissumik arsaqatigiinnissamut periarfissinneqarunik akeqqat Chiletut Canadatullu ittut ajugaaffigisinnaagitik, Kalaallit Nunaanni Assammik Arsartartut Kattuffiannit tusagassiorfinnut nalunaarummi oqaatigineqarpoq.
Sisamanngorpat kalaallit nalunaaqutaat malillugu 16.00 akeraassaaq ajugaassangatinneqarnerpaat Argentina. Kalaallit Nunaat ajornangajalluinnartumik semifinalemut suli annguteratarsinnaavoq, kisianni Argentinamut ajugaasariaqarput, peqatigitillugulu Canada Chilemut ajugaasariaqarluni.