Cuba ajornaveqaaq
Kalaallit assammik arsartartut Cuba-mut ajorsarput.
Kalaallit angutit assammik arsartartut aappaagu Sverige-mi VM-qarnissaanut anngussinnaajunnaarput pingasunngornermi Cuba-mut 25-32-mik ajorsaramik nikinnermi 13-17-mik kinguaqqareerlutik.
Kalaallit unammisartuisa Cuba angungajattaraluarpaat caribiamiulli taakku tamarmik 2 meteri missaliorlugu angissusillit ajornaveqaat.
– Unamminermi immikkoortup aappaani aamma kalaallit kinguarsimaannavipput. Angusarli 25-32 ajoriinnagassaanngilaq - taamaattorli angusaq taanna pissutaalluni VM-qarnissaanut kalaallit anngussinnaajunnaarput, taama GIF nittartakkamini allappoq.
Sisamanngornermi kalaallit Dominikanerit qeqertaanneersut unammissavaat, taakkulu pingasunngornermi unnukkut Brasilien uanmissavaat taakkulu ajugaassangatinneqarput. Sisamanngornermi pulje-mi ajugaanniunneq ingerlanneqassaaq tassani unammissallutik Brasilien aamma Cuba.
Kalaallit maanna anguniartussanngorpat panamerikamiut pissartanngorniunneranni pikkorinnerni taaneqartartut akornanniiginnarnissartik. Iligiit arfiniliit pikkorinnerit akornanniittarput appasinnerusumut inissittut anngunniuteqqaarlutik panamerikamiut pissartanngorniunnerisa naggataarnerani peqataasinnaapput.
Kalaallit isertitsisut tassaapput:
Hans Peter Motzfeldt 7
Miki Heilmann aamma Minik Dahl Høegh tamarmik 4
Jakob Larsen aamma Andreas Lorentzen tamarmik 3
Rasmus Larsen 2
Aqqaluk Sørensen aamma Miilu Rosing tamarmik 1.