Danmark sinnerlugu EM-eqataasussat
Arsaannermi EM-imut peqataasussanit 23-nit Morten Olsen 20-nik toqqaavoq. Thomas Kahlenberg tupaallaatigineqarnerpaavoq
Nuna tamakkerlugu sungiusaasoq Morten Olsen pingasunngornermi arsaannermi EM-imut peqataasussat amerlanersaannik toqqaammat Thomas Kahlenberg tupaallaatigineqarnerpaavoq.
Kahlenberg EM-imut anngunniunnerup annersaani peqataanngilaq, upernaarli Evianimi attartorneqareerlunilu Wolfsburgimi arsaattartup qaffasissusitoqqi tigoqqippaa.
- Unamminerni kingullerni arlalissuarni unammeqataavoq tamaasalu isiginnaarpavut. Kahlenberg sukkavallaanngikkaluarpoq eqqarsariataallaqqisuullunili. EM pingaaruteqalersinnaavoq, Morten Olsen oqarpoq.
Olsen arsaattartunit 23-nit Polenimut Ukrainemullu angalaqataasussanit 20-iinnarnik toqqaavoq, Kahlenbergilu januaarimi Evianimut attartortinneqareerluni februaarimi EM-eqataasussatut piukkunneqalerpoq.
- Februaarimi Evianimiilermalli qanimut malittaraarput, taamanimiimmi arsaqataanerusalerpoq. Evianimi aamma aalajangiisumik inissisimalerpoq naggataatigullu ilisarnarsilluarluni.
- Kahlenberg pikkorissuusoq oqaatigiuaannarparput, arsaattuaannarnermigullu pitsaassuseqaannarsinnaanerarlugu, piffissamilu kingullermi taamaaliorpoq, Morten Olsen nassuiaavoq.
Sungiusaasoq maajip 29-ata tungaanut piffissaqarpoq, taamanikkussamimi EM-imut peqataasussat tamaasa Europami arsaattartut kattuffiannut Uefa-mut nalunaarutigisussaav. Taamaattorli tamanna sioqqullugu inissat sinneri inuttalersinnaassangatippai.
Superligami naggataarnissaq utaqqimaaraa
Maajip 24-ani Superligami unamminerit kingulliit ingerlanneqareerpata taamaaliussagunarpoq.
Morten Olsen maannamut målmandinik marluinnarnik toqqaavoq, Thomas Sørensen Stephan Andersenilu, Anders Lindegaardillu Manchester Unitedimeersup suli peqataannginnini akuerisariaqarlugu.
Lindegaardili ulluni aggersuni sungiusaqataassaaq - aamma Groningenimi siukkaq Nicklas Pedersen kiisalu Hoffenheimimi ajuutsitsinaveersaartoq qiterleq Jannik Vestergaard. Kingullerli Morten Olsen naapertorlugu EM-imut peqataasussat akornanniinngilaq.
EM-eqataasussat siulliit sisamanngornermi Helsingørimi pissartanngorniunnissanut Danmarkip aallarniutaasumik Hollandimut, Portugalimut Tysklandimullu unammiffigisassaanut, sungiusaqatigiileriissapput.
Brasiliamut Australiamullu piareersarluni unammisoqareerpat nunanut allanut unammisartut juunip sisamaani EM-eqataajartorlutik aallassapput.
Toqqarneqartut ukuupput:
- Målmandit: Thomas Sørensen, Stephan Andersen.
- Ajuutsitsinaveersaartut: Lars Jacobsen, Michael Silberbauer, Simon Busk Poulsen, Daniel Wass, Simon Kjær, Daniel Agger, Andreas Bjelland.
- Qeqqaniittut: William Kvist, Christian Poulsen, Niki Zimling, Jakob Poulsen, Lasse Schøne, Christian Eriksen, Dennis Rommedahl, Tobias Mikkelsen, Michael Krohn-Dehli, Thomas Kahlenberg.
- Siukkat: Nicklas Bendtner.