Danmarkip ikiuisinnaanissaa neriuutigigaa
Pilersaarutit maanna inissinneqassapput, nutaanik ajugaanerni nuannisartitsisinnaasussat. Arnat sakkortuut unammeqattaarnerni kingullerni ilungersunartunik unammisassaqarput, taamaattorli: - Erfalasorput illersorlugu akersuutissaagut, nunanut allanut unammisartunut sungiusaasoq oqarpoq.
Assaat suli – qisuariarnertut – niaqqup qulaanut aallartarput, tassa arnat assammik arsartartut Nuummi juunip qiteqqunnerani angusarissaaqalutik angusaat nuannisarfioqisut eqqaaneqaraangata.
Ulluinnaalli nunanut allanut unammisartut sungiusaasuannut Anders Friisimut uterfigineqareersimalerput. Taassuma unammisaqattaarnerit misissoqqissaaleruttorpai, tamatumunngalu peqatigitillugu ukioru ilungersunartorsiorfiusussaq pissanganartorsiorfiusussarlu siumut takorloorlugu – VM-imut peqataanissaq Skandinaviami novembarimi aamma decembarimi pisussaq.
Piffissami matumani sulissutigineqaleruttorpoq – immaqa – assammik arsartartut katersorsinnaanissaat, aasap qaangiutilernerani Danmarkimi unammisaqattaarnernut peqataatissinnaanissaat siunnerfigalugu. Tamanna piareersarluni unammisaqattaarnerussagaluarpoq pingaarutilik. Aaqqissuussinerli aalajangersimasoq tamanna piviusunngortinneqassappat, aningaasaqarneq inissinneqaqqaartariaqarpoq. Tamannalu suli qulakkeerneqanngilaq.
- Unammisartut VM-imi pointinnassinnaanissaat piviusorsiortumik isigalugu qanoq ippa?
- Ajorsarniarluta sassartassanngilagut. Ilikkakkavut atorlugit sapinngisatsinnik unammisassaagut. Erfalasorput illersorlugu unammisaqattaartussaagatta tassa taamaappoq. Unammisassatta holdit allat ilungersortilaartarnissaat neriuutigaarput. Soorunami aamma ilisimalluinnarparput, Danmark, Norge, Sverige, Holland nunallu allat kakkattunik unammisartullit unammillersinnaanatigik. Taamaattorli nunat allat appasinnerusumi inissisimasut isiginiarutsigik periarfissaqarsinnaasugut takusinnaavara.
- Tamatumani kikkut eqqarsaatigaagit?
- Aap, Iranip VM-ip aallartinnerani qanoq inissisimaniarnera ilisimanngikkaluarpara – imaluunniit holdit Afrikamit peqataasussat inissitsiterneri ilisimanngilakka. Eqqarsarpungali taakku qaffasissusiat uatsinnut eqqaanarsinnaassasut, qaffasissusiilu Nuummi unammeriikkatta qaffasissusaannut sanilliunneqarsinnaassasut.
Aviisimi AG-mi atuarnerusinnaavutit. Aviisi uani pissarsiariuk:
