EM-imi iligiikkaarluni unammisaqattaarnerit pingaartinniarpaat
Taekwondo-tartunut tapersersuillutik aningaasaliissuteqartut amerlinerisa kinguneraat nunanut allanut unammisartut iligiikkaarluni unamminerni sakkortunerulernerat. Tamanna maajimi Slovenienimi EM-eqalerpat qanoq innersoq misilinneqassaaq.
Kalaallit Nunaata Taekwon-Domi Nunanut allanut unammisartui Nuummi sungiusaqqammerput taamaalillutillu Slovenienimi EM-eqalerpat maajip 12-ianit 17-iata 2009 tungaanut unammisaqattaarnissaminnut piareerlutik, iligiillu iligiit unammisaqattaarnissaannut annertuumik angusaqarusupput.
- Ataasiakkaarluni unamminerni tulimi aamma frikampimi sakkortuneruvugut. Kisianni maannakkut EM-imi tulimi, frikampimi aamma speciel techniquemi, imminut illersornermik takutitsinermi aamma power breakingimi iligiinnik peqataatitaqassaagut. Nunanut allanut unammisartut ataatsimoortinneranni iligiilluni unammisaqattaarnermi sungiusarneq aallunnerusimavarput, nuna tamakkerlugu sungiusaasoq Lauritz Heilmann oqaluttuarpoq.
- Soorunami neriuppugut ujaminnassalluta, kisianni nunat unammisassavut assut sakkortupput.
Team Grønland iluaqutigalugu Steen Rasmussen 2. Dan, aamma Ruslandimiissimavoq frikampimilu pikkorinnerpaat ilaat peqatigalugit sungiusarsimalluni, Sibiriallu Avannaani Pissartanngorniunnermi frikampimi aamm tul-imi kuultinnalluni.
Nunanut allanut unammisartut peqatigiiffinni illoqarfinnit makkunaneersuupput Nuuk, Qaqortoq, Sisimiut aamma Kangaamiut.
Nunanut allanut unammisartut EM-imimut peqataajartortussat tassaapput: Inuusuttuaqqat: Heidi Rasmussen 1. Dan, Nuuk, Steen Rasmussen 2. Dan, Nuuk, Angula Kielsen 1. Dan, Qaqortoq, Morten Rosing 1. Dan, Kangaamiut , Kunuk Hansen 1. Dan, Sisimiut, Jonathan Jonathansen 2. Dan, Sisimiut.
Inersimasut: Tina Nikodemussen 1. Dan, Qaqortoq, Qillaq Kielsen 1. Dan, Qaqortoq, Lars Sørensen 2. Dan, Sisimiut, Johan Peter Halsøe 3. Dan, Nuuk, Lauritz Heilmann 5. Dan, Nuuk.