Erik Jensen VM-imut isiginnaariarneq pillugu oqaaseqarpoq
Akileraartarnermut Aningaasaqarnermullu Naalakkersuisoq Erik Jensen sapaatip-akunnerani nipangersimareerluni arnat assammik arsarlutik Stavangerimi VM-erneranni peqataaneq pillugu oqaaseqarpoq. Peqataaneq ilaatigut Demokraatit siulittaasuannit Jens-Frederik Nielsenimit aamma Naleqqap siulittaasuanit Pele Brobergimit sakkortuumik isornartorsiorneqarpoq.
Erik Jensenip Norgemi assammik arsarluni unammiuaarnermut peqataanermini aningaasat 8.279 koruunit utertinnianngikkunarpai.
Naalakkersuisut siulittaasuata aamma Ilinniartitaanermut, Kultureqarnermut, Timersornermut Ilageeqarnermullu Naalakkersuisup paragraf 37 naapertorlugu akissutaanni allaatigineqartut assiginagit Erik Jensenip pisortatigoortumik suliassaqarneranik nassuiaateqanngilaq, taamaalillunilu Namminersorlutik Oqartussat angalanermut akiliinissaat tunngavissaqartinneqarani.
Apeqqutit
Marlunngornermi februaarip 13-ianni Sermitsiaq.AG-p Erik Jensen apeqqutinik ukuninnga nassippaa:
- Angalanerup akilerneqarneranut naapertuuttumik angalaninni suliassatigut pisussaaffeqarpit?
- Namminersorlutik Oqartussat akiliinissaat qanoq tunngavilersorsinnaaviuk?
- Qanoq ililluni angalanermut aningaasartuutit 4.719 koruuniinnaappat?
- Unamminerit qassit isiginnaarpigit?
- Aningaasat taakkua nunap karsianut utertinnissaat eqqarsaatigisimaviuk?
Akissut
Ippassaq marlunngornermi Sermitsiaq.AG Erik Jensenimit SMS-imik ima imaqartumik akineqarpoq:
"Utoqqatserpunga kingusissukkut akigama, saaffiginninnersili qujamasuutigaara.
Ilumoorpoq Stavangerimiissimasunga, tassanilu ilaatigut assammik arsartartut kattuffiata TAAK-ip siulittaasua Carsten Olsen ataatsimeeqatigalugu.
Tamanna pillugu oqaaseqaqqissinnaanngilanga.”
Akissutigineqartoq tunngavigalugu Sermitsiaq.AG Akileraartarnermut Aningaasaqarnermullu Naalakkersuisoqarfimmut allagaatit pillugit paasissutissanik piumasaqarpoq, Akileraartarnermut Aningaasaqarnermullu Naalakkersuisutut suliassani pisortatigoortumilluunniit suliassani pissutigalugit akileraartartut akiligassamik akiliisariaqarnerannik tunngavik Erik Jensenip akissutaani ersersinneqanngimmat.
Timersoqatigiit Assammik Arsartartut Kattuffiat (TAAK) Nuummi allaffeqarmat, Erik Jensenip TAAK-imilu siulittaasup Carsten Olsenip nunatta karsianut angalanermut aningaasartuuterpassuaqanngitsumik tassani ataatsimiissinnaagaluarput.
