arsaaffiit
GBU: Tikeraartoqaratta arsaaffik kanngunaqaaq
Arsaaffiit pillugit oqallinneq arsaattartut kattuffiata GBUp qujaruppaa
Arsaattartut kattuffiata kissaatiginerpaavaa qulisamik arsaaffeqalernissaq nunanut allanut unammisartut pisortatigoortumik Nunatsinni unammifigisinnaasaannik.
GBU taamatut nalunaaruteqarpoq franskip arsaattartup Romarin Billongip Variétés Club de France-meersup Nuummiinnermi arsaaffimmi atugassarititaasut uparuareerai.
- Taama ajortigisumik atugassaqarfiusumi arsaattartuuninni arsaannikuunngisaanarpunga, Romarin Billong Europamut utilerluni timmisartumut ikiartuutaa Sermitsiaq.AG-mut oqarpoq.
GBU: Kanngunaannarpoq
- Kangunaannarpoq arsaateqataasut ilaat oqaluttuarmat arsaaffimmi taama atugassaqarfiusumi arsaannikuunngisaannarluni. Tamatumali takutiinnarpaa Nunatsinni arsaattartut ulluinnarni atugaat qanoq ittuunersut, GBUp siulittaasua John Thorsen aamma pakatsisoq arsaaffeqarnikkut atugassarisaasut maanna aatsaat oqallisaalermata.
Nunatsinni arsaaffiit ujaraaqqanik qallikkat pitsaanngequtarput masakkaangamik aammalu panerpallaaleraangamik. Piffissami sivisujaami masannartuliorsimatinnagu arsaaffiit pujoralattorujussuanngortarput pissartanngorniuttoqartillugulu qatserisartut arsaaffimmik isuguttarterisariaqartarlutik.
Timersuutit allat iluaqutissaat
- Suli maannamut misissorneqarnikuunngilaq pujoralak meeqqat, inuusuttut inersimasullu peqqissusaannut qanoq sunniuttarnersoq. Kisinni oqaatigisinnaavarput arsaattartuusimasut naggussaminnik anniartunngortarmata nalunaaquttap akunnerpassui manngertumi arsaattarsimanerup kinguneranik, John Thorsen oqarpoq.
Maanna Inatsisartuni amerlanerussuteqartut taperserpaat kommunet tamarmik ivigaaraasanik qallikkanik arsaaffeqalissasut. GBUlli isumaa malillugu tamanna naammanngilaq qulisamillu arsaaffeqalernissaq periarfissatut tikkuarlugu.
- Taanna ukioq naallugu atorneqarsinnaavoq sungiusarfissatullu nalunaaquttap akunnerpassui atorneqartartut illup iluani timersuutinut allanut iluaqutissanngortinneqartussamik aammalu pitsaaliuinermut iluaqutaasussanngortinneqarsinnaasumik, John Thorsen oqarpoq
Ivigaaraasanik arsaaffiit pillugit siunnersuut Inatsisartut aappassaannerlugu marlunngornermi oqaluuserissavaat.