GHF Banknordikilu suleqatigiilersut

Sapaatip-akunnerani aggersumi inersimasut assammik arsarnermi GM'ernerat Ilulissani ingerlanneqassaaq. Nunatsinni pissartanngorniunneq taaguuserneqarpoq, tassalu Banknordik GM, pissartanngorniunnerillu ukiuni tulliuttuni pingasuni taama taaguuteqassapput.

Isumaqatigiissut GHF-ip siulittaasuanit, Boas Møllerimit, aamma Banknordikimi immikkoortortamut pisortamit, Bjartur Nolsøemit, atsiorneqarpoq. Isumaqatigiissut illuatungeriinnit naammagisimaarneqarpoq, ukiunullu tulliuttunut pingasunut aningaasaliissutit saniatigut isumaqatigiissut Banknordikip sapaatip-akunneranut akunnerni arlalinni allaffissornikkut GHF-imut ikiuuttarnissaanik aamma imaqarpoq.

Siorna Nuummi Banknordik aamma akuuvoq, tamatumanilu aningaasaliissutit ajunngilluinnartumik qisuariarfigineqarsimasut aningaaserivik misigisimalluni. Taamaattumik aningaaserivimmut ineriartornerup pitsaasup tamatuma assammik arsarnermut GM-eqartillugu isiginnaariarpassuaqartartumut aamma atuuttup ingerlateqqinnissaanut aningaaserivik piumassuseqarluarsimavoq.