GIF-imi siulersuisut qaffasissumik ilinniarsimasuusariaqarput
Kalaallit Nunaanni Timersoqatigiiffiit Kattuffianni unammilligassat angisoorujussuummata siulersuisut qaffasissumik ilinniagaqarsimasuunissaat pisariaqarpoq.
Kalaallit Nunaanni Timersoqatigiiffiit Kattuffiata GIF-ip siulittaasuata Nuka Kleemannip siulersuisunut inuit marluk siunnersuutigai. Tassalu advokat Finn Meinel aamma Karsten Høy, kukkunersiuisartutut ilinniarsimasoq. Siulittaasup tulliatut inissaq pilerngunneqartussaavoq, volleyballertartut kattuffiata siulittaasua Aalipaaraq Kreutzmann Finn Meinelilu tassunga qinigassanngortissimammata.
– Uanga siulittaasutut kissaatigaara, GIF-imut piumasaqaatit qaffakkiartornerat ilutigalugu siulersuisuini ilaasortanngortartut qaffasisumik ilinniagaqarsimasuusassasut, Nuka Kleemann Sermitsiamut oqarpoq.
GIF-imut aallartitat arfininngornermi oktoberip qulinganni ileqquusumik Nuummi ataatsimeersuassapput, tassanilu ukiorpassuani siulersuisuni ilaasortaasimasoq siulittaasumullu tulliusimasoq Anni Damgaard tassunga qinigassanngorteqqinniarani nalunaarpoq.
Siulittaasup tullissaanik qinersinerup saniatigut aamma siulersuisuni ilaasortassanik nutaanik marlunnik, ukiuni tulliuttuni sisamani ilaasortaasussanik qinersisoqassaaq.
Volleyballertartut kattuffiata Aalipaaraq Kreutzmann siulittaasup tullissaatut qinigassanngortippaa, GIF-illi siulersuisuisa Finn Meinel qinigassanngortillugu.